Manipur CM-in UNC-te dan pawna hnawl turin sorkar laipui ngen

Manipur Chief Minister Okram Ibobi Singh chuan United Naga Council (UNC)-te chu dan pawnah hnawl turin sorkar laipui a ngen.

Kar kalta Inrinni khan Congress Legislature Party (CLP) chuan meeting an nei a, UNC-te dan pawna hnawl an remti a ni. Chief minister Ibobi Singh chuan, UNC-te chetdan chu uchuak a tih thu sawiin, tiam chin awm loa National Highway (NH) danchah chu mipuite zahlohna leh dan palzutna a nih thu a sawi. CLP chuan an chetdan hi a dem tak zet a, dan pawna hnawl a remti a, chumi tur chuan sorkar laipui chu hmala turin a phut a ni, a ti. UNC-te chu remna zawnga inbiakna neih duh lohah puhin, sorkar hmalakna dodal zawnga chet tum hrim hrimah a puh bawk.

Congress thupuangtu Khumukcham Joykishan chuan, NH danchah a nih hnuah buaina a chhuak fo tawh tih sawiin, nunna chan eng emaw zat an awm tawh a, lirthei eng emaw zat hal a ni tawh bawk niin a sawi. Mipuite chuan UNC-te chetdan hi an dem tak zet a, sorkar laipui chu dan pawnah hnawl turin an duh a ni, a ti. State sorkar chuan remna zawnga inbiakna nei turin hma a la reng a, mahse UNC-te chuan kawng hrang hrangin hmalakna hi an dodal a ni tiin Joykishan chuan, Congress sorkar chuan state chhunga hnam hrang hrangte hamṭhatna a ngai pawimawh a, state mipuite hmasawna tura hmalakna dodal zawnga chetna chu a dem tak zet a ni, a ti.

Hetih lai hian UNC-te chuan NH an danchah mek chu an chhunzawm zel tur thu an sawi. Sorkar laipui hmalaknaa inbiakna neih a nih ṭumin UNC-te hian an thil phut a hlawhtlin hma loh chuan NH danchah tawpsan an tum loh thu an lo sawi tawh a ni. Tunhnai khan Home Ministry chuan UNC-te chuan nawrh tawpsan loa an kalpui zel a nih chuan remna zawka inbiakna neihpui a tum tawh lo nia tarlan a ni. Minister of State for Home Affairs Kiren Rijiju chuan, state sorkar remtihpuina tel lo chuan sorkar laipui chuan hma ala tak tak thei lo niin a sawi.

Manipur sorkar chuan dan leh thupek mumal zawka kenkawh a nih theih nan sorkar laipuiah central paramilitary force, company 60 thawn lut turin a lo ngen tawh bawk. Hetih lai hian UNC President Gaidon Kamei leh Publicity Secretary S. Stephen-te chu nikum November 25 khan man an ni a, tun thlengin judicial custody-ah dan an la ni. February 3-a sorkar laipui hmalaknaa New Delhi-a inbiakna neih a nih ṭum khan an kal phal sak an ni thung.

Chief Minister Okram Ibobi Singh chuan, United Naga Council (UNC)-te dan pawna hnawl chungchangah hian sorkar laipui thutlukna an ngaihchan mek thu a sawi.