Manipur-ah thlawhtheihna hmangin nitin mamawh thawnluh a ni dawn : Javadekar

Human Resource Deve­lopment Minister Prakash Javadekar chuan Manipur-ah thlawhtheihna hmangin nitin mamawh thawnluh a ni dawn tih Pathianni khan a sawi.

Union minister Javadekar chuan, United Naga Council (UNC)-te'n tiamchin awmloa National Highway (NH) an danchah mek chu tawpsan tawh tura a duh thu sawiin, ni hnih hnua an la tawpsan lo fo a nih chuan, sorkar laipui hmalaknain thlawhtheihna hmangin mipuite mamawh zualpui thawn luh a ni ang, a ti. A bikin gas, buhfai leh oil-ahte nasa takin mipuiten harsatna an tawk mek tih sawiin, sorkar laipui chuan harsatna zualpui phuhru tur hian ruahmannna a siam thu a sawi. Hunrei tak chhung NH danchah a nih avanga mipuite chunga tawrhna thleng chu pawi a tih thu sawiin, a sutkianna tur kawng dap zel a ni ang, a ti.

Manipur assembly election neih tura BJP tana campaign mek, Javadekar hian kar liamta khan Manipur a thleng a, vantlang inkhawmah vawi eng emaw zat thu a sawi a ni. Congress sorkarin kum 15 chhung ro a lo rel tawhna chu paihthlak a ni dawn tih sawiin, an hun a herchhuah ve tawh tur thu a sawi. Congress sorkar chuan mipuite mamawh tui a pe mumal thei lo a, hmasawnnain mipui hnen a thleng phak lo a ni tiin, state chhunga hnam hrang hrangten sorkarah rinna an nghat ngam lo a, sorkar hmalakna dodalin buaina lian zawk a hringchhuak ta a ni, a ti. UNC-te'n nikum November 1 aṭanga NH an danchah chhanah Congress sorkar a puh bawk.

HRD minister chuan Manipur Chief Minister Okram Ibobi Singh chu bei zuiin, mipuite harsatna ngai pawimawh lo leh, an harsatna tawh mek sukiang tura hma la chak tawk loah a puh. A lakah mipuiten rinna an nghat ngam lo nia sawiin, CM a nihna tlin loha a puh. Hetih lai hian Ibobi Singh chuan Bharatiya Janata Party (BJP) leh Naga helpawl National Socialist Council of Nagalim (Isak-Muivah)-te chu inthurualah puhin, tualchhung buaina thleng mekah mawhphurtu an nih thu a sawi. Mipuite chuan Congress sorkarah rinna an la nghat tih sawiin, BJP-NSCN(IM) chuan fiahna an hmachhawn thuai dawn tih a sawi. State sorkarin district thar pasarih a din chu BJP chuan ahelh hle niin a sawi a, UNC, BJP leh NSCN(IM)-te chuan inthurualin nasa takin an dodal a ni, a ti. District thar din chhan sawiin, rorelna felfai zawk a awm theih nana ti an nih thu a sawi bawk.

Deputy Chief Minister Gai­khangam Gangmei pawhin, UNC-te hmalkana chu mipuiten an thlawp lo nia sawiin, sorkar hmalana dodal zawnga an chetdan chu a dem tak zet thu a sawi. District thar din chu mipuiten hun rei tak aṭanga an thlakhlelh tawh a ni, a ti. Manipur-in asssembly election a hmachhawn turah, regional leh national party-te chu campaig an bei ngawrh chho hle a, central-a party hruaitu lawkte pawhin party tana campaign turin Manipur an tlawh fo a ni. Rorellai Congress party leh BJP-te chu inkhing tawk ber tura ngaih an ni. Hetih lai hian UNC-te'n Manipur chakkhai lamna kawngpui pawimawh NH-37 an la danchah reng avangin inthlanah nghawng ṭha lo a thlen a hlauthawnawm nia sawi a awm bawk.