Nagaland : JCC leh NTAC-te'n bandh huaihawt

Joint Coordination Committee (JCC) leh Nagaland Tribes Action Committee (NTAC)-te chuan nimin aṭang khan tiamchin awm loin Nagaland-ah bandh an huaihawt.

JCC leh NTAC-te chuan Urban Local Body (ULB) election-a hmeichhe tana seat 33% hauhsak tura state sorkarin thutlukna a siam avanga lungawi loin, Chief Minister TR Zeliang leh a cabinet minister-te chu bang turin an phut a, kar kalta Zirtawpni thleng khan an hun tiam a tawp a ni. Huntiam chhunga miniter-te'n banna an thehluh loh avangin bandh hi huaihawt a ni ta a ni.

NTAC media cell chuan bandh hi boruak muanawm tak hnuaiah kalpui an duh thu an sawi a, buaina chawkchhuak thei zawnga che lo turin mipuite an chah. Bandh hian zirna in a huam huam tel loh thu sawiin, zirlai exam hmachhawnte tana harsatna siam an tum loh thu an sawi. NTAC pawhin, minister-te chu mipuite chunga tawrhna thlentuah puhin, bang tura an phut thu an sawi nawn leh. Bandh hian Nagaland Board School Education hnuia HSSLC/HSLC exam bei mekte a huam lo a, sorkar office dangte chu khar a ni. Dawr leh sumdawnna hmunte pawh khar a ni a, lirthei chevel hmuh tur a awm meuh lo.

Nagaland-ah hian ULB election atana state sorkarin hmeichhe tan seat 33% hauhsak a remtih avangin, tribal pawl hrang hrangte chuan lungawi lohna an lan tir mek a ni.