Tripura HC-in judge indaih lo

Tripura High Court chuan judge a indaih loh avangin thubuai chinfel loh ṭhahnem tak a awm tih a sawi.

Tripura High Court Chief Justice T Vaiphei chuan thla liamta khan, judge an indaih loh chungchang hi Supreme Court Chief Justice JS Khehar hnenah ziakin a thlen a, hmalak pui turin a ngen. T Vaiphei chuan chuan judge indaihlohna avangin thubuai ṭhahnem tak chinfel loh a awm thu sawiin, an harsatna sutkian a nih theih nan hmalak pui turin Chief Justice JS Khehar a ngen a ni. Tripura High Court chuan thubuai chinfel loh 2,885 vel zet a neih thu sawiin, Article 224AA tlawhchhana additional judge pe turin a ngen. Thubuai 35 zet chu Gauhati High Court-ah chinfel tura an thehluh tawh thu a sawi bawk.

Kum 2013 khan Tripura High Court hi din a ni a, judge pali an awm a, tun hnai khan pakhat chu a pension a ni. Tunhnaiah Tripura-ah hian `Maha Lok Adalat` buatsaih a ni a, temporary court 40 siam niin, thubuai 21,984 zet chu nikhat thil thuah chinfel a ni. Heti chung hian thubuai tam tak chu chinfel lohin a la awm tih, Tripura State Legal Services Authority member-secretary Bipradas Palit chuan a sawi.

Tun hnai khan Union Ministry of Law and Justice chuan Gauhati, Sikkim, Manipur, Meghalaya leh Tripura HC-te tan judge 28 a dah belh a ni. Gauhati High Court hian Assam, Nagaland, Mizoram leh Arunachal Pradesh-ahte bench a nei a, hengah te hian judge 17 a dah belh bawk. Kum 2013 khan Meghalaya leh Manipur-ahte High Court din a ni a, judge pathum ve ve an nei mek a ni a, Sikkim High Court chuan judge pahnih a nei mek bawk. Arunachal Pradesh, Nagaland leh Mizoram-te chuan High Court hran an la nei lo.