Nagaland : JCC leh NTAC-te'n bandh chhunzawm zel

Joint Coordination Committee (JCC) leh Nagaland Tribes Action Committee (NTAC)-te'n Thawhṭanni aṭanga Nagaland-a bandh an huaihawt chu chhunzawm zel a la ni a, mipuiten an thlawp ṭha hle.

Bandh hi JCC leh NTAC-te'n Nagaland chief miniter TR Zeliang bang tura nawr nana an huaihawt a ni. Nagaland cabinet chuan kum 2015 khan Urban Local Body (ULB) election-a hmeichhe tana seat hauhsak tura thutlukna a siam duh lohna kal zel a ni. NTAC hruaitu K.T. Vielie chuan chief minister-in banna a thehluh hma chuan bandh chu kalpui zel an tum thu sawiin, an hmalakna thlawp turin mipuite a ngen. Bandh huaihawt a nih avang hian state secretariat office khar a ni a, central leh sorkar office-te pawh khar a ni. Bank leh zirna-in

ṭhenkhatte chu khar a ni a, zirlai exam hmachhawn mekte erawh a huam lo thung. Sumdawnna hmunte khar a nih bakah, lirthei chhuak vak pawh hmuh tur a awm meuh lo.

Bandh hian Kohima leh Manipur inkalpawhna kawngpui pawimawh National Highway-2 pawh a nghawng nia tarlan a ni. Bandh huaihawttu ṭhen­khatte chu kawngpuiah an pung­khawm a, lirthei eng emaw zat kawngdungah an tangkhang mek a ni. Nagaland Police chief L.L. Doungel chuan mipuiten bandh an zawm ṭhat thu sawiin, boruak duhawm loh thleng hriat tur a awm loh thu a sawi. Venhim hna thawk turin police ṭhahnem tak duty tir an nih thu sawiin, Mobile data service chu January 30 aṭang khan titawp lailawk a nih thu a sawi bawk.

State khawpui Dimapur-ah chuan JCC-te'n khauh takin bandh an kengkawh a, NH-29 chu danchah a la ni. Dimapur-a Hotel Senti leh Hotel Targopan bakah, Khermahal, Nagarjan leh Clock Tower bul velahte mipui ṭhahnem tak an pungkhawm a ni. Diphupar leh Sovima khuaahte chuan traditional dress-a inthuam hmeichhe ṭhahnem tak chuan kawng an zawh a, thuziak eng emaw zat tar a ni. Chief minister ngaihthlak turin mipui kawngzawhte au ri record a ni bawk. Chief minister chenna hmun chu state police leh IRB-te'n ngawrh takin an veng a ni.

Angami Youth Organization (AYO)-te chuan bandh hi an thlawp a, tribal pawl eng emaw zatin thlawpna an lantir ve bawk. Phek district-ah chuan Chakhesang Youth Front (CYF)-te'n bandh hi an huaihawt a, Phek, Pfutsero, Chozuba, Chetheba, Chizami leh Sekruzu town-ah te chuan bandh hian thlawp a hlawh ṭha hle tih, CYF president Welete Kapfo chuan a sawi.

Hetih lai hian Naga Peace Task Force leh Indian Red Cross Society Nagaland Branch-te chuan first aid pek hna an thawk a ni. Minister Hill area, Jail Colony leh Raj Bhavan area-ahte chuan CrPC Section 144 puan a ni a, mi panga aia tam punkhawm khap a ni. February 13 aṭang khan NTAC leh JCC-te hmalaknain bandh hi huaihawt ṭan a ni a, Pochury Hoho, Pochury Youth Association (PYA) leh Müluo Shefüri Kügharü-te chuan bandh ṭanni aṭangin an thlawp a ni.

ULB election hi February 1-ah neih tura tih tawh kha a ni a, tribal pawl hrang hrangte dodalna avangin kal­tlangpui a ni lo. State cabinet chuan ULB election atan hian seat 33% hauhsak turin thutlukna a siam a, chu chu tribal-te chuan nasa taka dodalin, an hnam tihdan phung kalh a nih thu an sawi. Nagaland hi kum 1963 khan state-ah hlankai a ni a, state an nih hnu hian hmeichhe MLA pakhat mah an la awm lo. Hetih lai hian kum 1977 khan Rano M. Shaiza chu MP atan thlan tlin a ni.