BJP-in Manipur-ah Sorkarna siam inring

Manipur assembly election neih turah Bharatiya Janata Party (BJP) chuan hnehna changin, sorkarna an siam ngei dawn niin Union Human Resource Development Mi­nister Prakash Javadekar chuan Thawhṭanni khan a sawi.

BJP Manipur in-charge ni bawk Prakash Javadekar chuan, BJP chu Congress sorkar paihthla theitu awm­chhun an nih thu sawiin, kum 15 zet Congress sorkar chu paithhlakin a awm dawn a ni, a ti. Manipur-a BJP sorkar a din hunah chuan eirukna laka fihlim lote chu tan-inah khung zel an nih tur thu sawiin, eirukna chu a tak taka an do tur thu a sawi. BJP chuan party malin hnehna an chang ngei dawn tih sawiin, mipuite chu hmasawnna tur tak tak thlen theitu tur ngaihtuah chunga an party vote turin a sawm.

Javadekar hian BJP Election Committee hruaitu Chaoba-a chenna ina meeting an neihah he thu hi a sawi a ni. Union minister Javadekar chuan election result puan a nih hnua sorkarna an siam hnuah, chief minister Okram Ibobi Singh chu eiruk thubuai siam sakin, tan-inah an khung dawn niin a sawi bawk.

Hetih lai hian CM Okram Ibobi Singh-a fapa Okram Surjakumar chuan Thawhṭannni aṭang khan campaign a nei ṭan a, Kangabok consti­tuency-ah a chuh dawn a ni. He bial hi a nu Okram Landhoni-i bial hlui a ni a, kumin assembly-ah chuan a fapa a kian dawn ta a ni. Manipur hian assembly seat 60 a nei mek a, rorellai Congress party leh BJP-te chuan seat awm zawng zawng hi an chuh vek dawn a ni. Inthlan hi thawh hnia kalpui a ni dawn a, March 4 leh 8-ah mipuiten vote an thlak ang a, vote tla te hi March 11-ah chhiarin, result puan nghal a ni ang.