AP-ah cabinet thutlukna duhlohna lantirin band huaihawt

Arunachal Pradesh-a Lika­bali-ah chuan Pathianni khan bandh huaihawt a ni a, mipuiten an thlawp ṭha hle nia taralan a ni.

Bandh hi Likabali Youth Federation, Likabali Elite Forum, Ramla Bango Student Union, Likabali Volunteer Youth Association, Likabali Women Welfare Society leh pawl dangten an huaihawt a ni. State cabinet chuan Lower Siang district chu district headquarters lailawk atan a pawm a, hemi duh lohna lantir nan hian bandh hi huaihawt a ni. National Highway (NH) leh inkalpawhna kawngpui pawimawh dangte chu dan a ni a, lirthei ṭhahnem tak an tangkhang hman a ni. Bandh hi kalpui chhunzawm a nih avangin sorkar office leh school ṭhenkhat khar a ni a, sumdawnna hmunte pawh khar a ni.

Cabinet thutluknaa lung­awilote chuan Likabali chu Lower Siang-a district lian ber a nih thu an sawi a, hmasang ata tawh district headquarters hlun a ni, an ti. Libo Student’s Union president, Tom Taju chuan bandh hi an thlawp thu sawiin, cabinet thutlukna sut leh an phut thu a sawi. Likabali chu kum 1994 aṭanga district headquarters a nih tawh thu a sawi bawk.

Tom Taju chuan, Pema Khandu kaihhruai sorkar chuan Likabali chu district headquarters-a puan a lo remti tawh nia sawiin, mahse tun hnaia cabinet meeting chuan district headquarters thlak turin thutlukna a siam leh si a ni tiin, a dem tak zet thu a sawi.

Bandh huaihawttu pawl hrang hrangte chuan cabinet thutluknaa an lungawi loh thu hi Union Minister of State for Home, Kiren Rijiju hnenah thlen an tum a ni.