Manipur Poll : BJP-in sum hmangin Sharmila an thlem
Manipur assembly election neih turah, 'Manipur Iron Lady' Irom Sharmila-i chu Bharatiya Janata Party (BJP) chuan an party ticket-a ding turin sum tam tham takin an thlem nia tarlan a ni.
Social activist Sharmila-i chuan,"BJP hian an party ticket-a ding turin min sawm a, cheng vaibelchhe 36 pek min tiam a ni" a ti. Sharmila-i chuan tun hnai khan hemi chungchang hi sawi chhuakin, Armed Forces Special Powers Act (AFSPA) hlih a nih theih nana hun rei tak chaw nghei a kalpui tawh, nikum August thlaa a tawpsan hnu khan BJP chuan sawmna an pek thu a sawi. Central-a BJP hruaitu ṭhenkhat chu a hmuh thu sawiin, an hnen aṭanga thurawn pawh a lak thu a sawi. Politics luhchilh tura thutlukna a siam hnuah BJP chuan Manipur assembly election neih turah an party canddiate ni tura an sawm thu leh, sum tam tham tak pek an tiam thu hi a sawi.
Sharmila thusawi hi BJP hruaitu Ram Madhav chuan chhang letin, "Sharmila-i thusawi hi dawt hulhual a ni" a ti. BJP chuan Manipur assembly election atan uchuak taka sum an hman loh thu sawiin, Sharmila-i'n dawta an party a puh chungchangah an lawm lo hle tih a sawi.
Sharmila-i hian kum 16 chhungzet chu AFSPA hlih a nih theih nan chaw nghei a kalpui a, kum August 9 khan a tawpsan a ni. Chaw nghei a tawpsan hnu hian Sharmila chuan party thar 'People’s Resurgence and Justice Alliance (PRJA)' a din a, election neih turah pawh candidate eng emaw zat an thehchhuak dawn a ni. Sharmila hian chief minister Okram Ibobi Singh chu Thoubal bialah a khing dawn a, Khurai bialah a chuh tel dawn bawk.