Assam : Cachar district-a khaw 206-ten tuilian an tuar

Assam-a ruahsur nasa avanga tuilian leh leimin nasa tak thleng avangin mipuiten harsatna an tawk chhunzawm zel a, tuilian tuar nasa ber Cachar district-ah chuan khaw 206-a cheng, mi 96,697-te harsatna an tawk mek a ni.

Assam State Disaster Management Authority chuan Cachar district-ah tuilian hian thlai chinna ram hectare 1,462.90-a zau a chim a, Silchar circle-ah kaccha house 106 a chhe tawh bawk niin a tarlang.

New Kunjung, Fiangpui, Moulhoi, Namzeurang, South Bagetar, Mahadev Tilla, Kalibari, North Bagetar, Zion and Lodi Pangmoul khuaahte leimin vangin chhiatna nasa tak a thleng bawk.

Water Resources Division-in a tarlan danin, Annapurna Ghat-a tui level chuan nimin chawhma dar 11 vel khan hlauhawm chhinchhiahna a pel a, darkar khat danah tui level hi 6 cm velin a san belh zel a ni. Barak lui lian chuan Malugram leh Sonai kawngpuite chimin, Silchar leh district chhung hmun tam tak a chim bawk.

Indian Army leh Assam Rifles sipaite chu Cachar district-a tuilian tuarte chhanchhuah hna thawk tur hian tirh an ni.

State pumah district 26-a cheng mi nuai li chuangin ruahsur nasa avang hian harsatna hi an tawk a, sorkar chuan relief camp 89 siam tawhin heng hmunah hian mi sing li vel an khawsa mek.

Northeast Frontier Railway (NFR) chuan leiminin Mabiong leh Bandarkhal-a relkawng a tichhiat avangin May 25 thleng atan Tripura, South Assam, Manipur leh Mizoram rel service chu a titawp rih bawk.

CS hoin review meeting nei
Ni eng emaw chen Dima Hasao, Hojai, Cachar leh Barak Valley district-ten tuilian leh leimin avanga harsatna an tawh chungchang ngaihtuahin, Guwahati-ah chief secretary Jishnu Barua hoin review meeting neih a ni.

Meeting-ah hian Assam State Disaster Management Authority, National Disaster Response Force (NDRF) leh State Disaster Response Force (SDRF) official-te an tel. Indian Air Force (IAF) leh Indian Army, NF Railway, NHAI, PWD (Roads), FCI aiawhte an tel bawk.

Chief Secretary chuan Assam State Disaster Management Authority chuan chhiatna thlen dan hrang hrang enfiah nan drone leh satellite te an hmang dawn tih a sawi. Tuilian tuarte hnena ei tur semna kawngah Indian Air Force-in a pui dawn tih a sawi bawk.

Tuilian vangin Class 11 exam ṭhulh
Tuilianin state chhung hmun hrang hrangah harsatna a thlen avangin, Assam Higher Secondary Education Council (AHSEC) chuan June 1 aṭanga neih ṭan tur, Assam Class 11 exam chu a ṭhulh.

AHSCE Controller of Examinations Pankaj Borthakur chuan thuchhuah siamin, ruahsurin an state-a chhiatna nasa tak a thlen vang leh, zirlaite himna tur ngaihtuahin exam hi ṭhulh a nih thu a sawi.

Amit Shah-a'n puih a tiam
Union home minister Amit Shah chuan Assam chief minister Himanta Biswa Sarma biain, Assam-in harsatna a tawh mekah sorkar laipui chuan a theih anga a puih tur thu a sawi.

Home Minister chuan a twitter-ah Assam chungchang hi ziak langin, Assam dinhmun tawn mek chu an ngaihven reng thu leh, CM Sarma nen pawh an sawidun thu a tarlang a, NDRF team tirh an ni tawh a ni, a ti.