Tripura-in ei tur leh fuel lakluh dan dap mek

Assam-a ruahsur nasain hmarchhak state dangte kalpawhna relkawng a tihchhiat avangin state dangten harsatna an tawh phah ve mek a, Tripura-ah pawh rel a luh theih loh avangin ei tur leh fuel indaih loh mai a hluahthawnawm ṭan. Hei vang hian thuneitute chuan petroleum products leh ei turte kawnga lakluh dan an buaipui mek.

Leiminin rel kawng bakah National Highway-te a tichhe tel a, mahse state thuneite chuan nitin mamawh, a bikin chaw lam chite lakluh dan ngaihtuahin theihtawp an chhuah mek tih an sawi. Thawhlehni khan Food Corporation of India (FCI) leh Oil India official-te pawh meeting an neihpui a ni.

Sorkar chuan thuchhuah siamin, Badarpur bula rel kawng a chhiat vang leh, NH-44-a motor a tlan theih loh vangin petroleum, oil leh mamawh dang an lakluhna kawngah harsatna an tawk a, hei vang hian oil hralhchhuah kawngah pawh khuahkhirhna siam a ni, a ti. Thupek tihchhuahah, two-wheeler-te chu ṭum khatah petrol Rs 200 man chin chauh an lak phalsak niin, three-wheeler chu Rs 300 leh four-wheeler chu Rs 1,000 chin chauh an lak phal a ni.

Food and Civil supplies department chuan ei tur lamah chuan harsatna an la tawk lo a, stock pawh an la ngah tih a sawi a, mahse ruah a sur chhunzawm zel a nih chuan ni sarih hnuah chuan bazar lamah thil awmdan a danglam tawh a rinawm thu a sawi.