Manipur-ah tui a len belh zel

Manipur-ah ruah a sur chhunzawm reng avangin hmun tam zawkah tui a len belh zel. Jiribam district, Imphal West leh Imphal East district-ten tuilian an tuar mek a ni.

Tamenglong leh Noney district-ah lei min nasa tak a thleng a, hei vang hian Thawhlehni aṭang khan NH-37 (Imphal-Jiribam section) ah motor an tlan thei lo. Tamenglong-Tamei Road, Tamenglong-Nagaland Road, Tamenglong-Tousem Road, Imphal- Noney kawngpuite pawh leiminin a hnawh ping bawk.

Jiri lui chuan hlau­hawm chhinchhiahna a pel a, Dibang, Kadamtala, Kamaranga leh Latingkhal-te chu tuiin a chim a, Kamranga khuaa in 60 chuang chu tuiin a chim avangin mi tam tak chu relief camp-ah an awm mek a ni.

State water resources minister Awangbou Newmai chuan ruah a la sur chhunzawm zel avangin an department pawhin theihtawpin an inbuatsaih a, department mi leh sate chu an post-na hmunah a ṭul dan anga thawk chhuak thei tura awm vek tura hriattir an ni, a ti. State chhunga an lui lian zawng zawngte deuhthaw chuan hlauhawm chhinchhiahna an pel tawh a, thil awmdan chu department-a officer leh engineer-ten an enfiah reng tih a sawi.