Nagaland: Bandh-in zirlaite exam a tibuai lo

16th February, 2017

Nagaland Tribes Action Committee (NTAC) leh Joint Coordination Committee (JCC)-te'n tunkar Thawhṭanni aṭanga bandh an huaihawt chuan nunphung a tikhaihlak nasa hle a, mahse zirlaite chuan Thawhlehni aṭang khan boruak ralmuang tak hnuaiah exam an hmachhawn ṭan.

Nagaland Board of School Education (NBSE) hnuaia Class X, XI leh XII zirlaite chuan exam an hmachhawn mek tih, Nagaland School Education Minister, Yitachu chuan a sawi. Education miniter Yitachu chuan, zirlaite chuan harsatna awm loin exam an hmachhawn thei a, boruak duhawm loh thleng a awm lo, a ti. Zirlaite tan a hranin veivahna ngaihtuahsak an nih thu sawiin, exam centre zawng zawngah mumal taka lirthei chet vel dan ruahman a nih thu a sawi. NBSE hnuaiah hian zirlai 55,190 velin exam hi an hmachhawn a ni.

NTAC hruaitu K.T. Velie chuan, bandh huaihawt chuan zirlaite tana harsatna a thlen loh nan ruahmanna mumal tak siam a nih thu a sawi ve bawk a, boruak muanawm tak hnuaiah exam an hmachhawn an duhsak tih a sawi. Hetihlai hian Nagaland RMSA Teachers Association (NRMSATA) chuan thuchhuah siamin, zirlaiten board exam an hmachhawn laia bandh huaihawt a ni chu an dem thu an sawi. NRMSATA president Renbemo L Patton chuan, state sorkar chu zirlaite hmakhua ngaia remna zawnga JCC leh NTAC-te inbiakna neihpui turin an phut tih a sawi.

Nagaland Tribes Action Committee (NTAC) leh Joint Coordination Committee (JCC)-te hian chief minister TR Zeliang chu Urban Local Body (ULB) election-a hmeichhe tana seat 33% hausak tura thutlukna siam a nih chungchangah mawhphurtu berah puhin, bang turin an phut a ni. Mahse chief minister chuan a ban loh tur thu a sawi a, hemi hnu hian bandh hi huaihawt a ni zui ta a ni.

Hetih lai hian CM T.R. Zeliang chuan JCC leh NTAC-te'n bang tura an phut chu awm lo a tih thu leh, dan kalh a nih thu a sawi. Zeliang hi February 10 thleng khan banna thehlut tura hun pek a ni a, banna erawh a thehlut lo thung. Rorel lai Naga People’s Front (NPF) chuan CM-in banna tur chhan a neih loh thu leh, a ban loh tur thu an tarlang ve bawk.