Manipur mipuiten Congress an hnawl : Ram Madhav

Bharatiya Janata Party (BJP) general sec­retary Ram Madhav chuan, Manipur mipuiten Congress party an hnawl niin a sawi a, BJP chu sorkarna siamtu tur niin Thawhlehni khan a sawi.

Ram Madhav chuan, Congress party chuan a tam berah seat 20 vel baka an lak a rin tawh loh thu sawiin, assembly seat 60 awma a tam zawk chu BJP chuan an hui theih a beisei tih a sawi. Chief minister O Ibobi Singh-a kaihhruai sorkarah mipuite chuan rinna an nghat ngam tawh lo a, an hnuchhawn mek zel a ni, a ti. Assam leh Arunachal Pradesh-te hnung zuiin Manipur-ah a kaihhruai sorkar a ding dawn a ni, a ti. Kum 2016 hma lamin hmarchhak state-ah BJP-in sorkarna a la chang ngai lo a, a vawikhatna atan kum 2016 Assam assembly-ah BJP chuan hnenna a chang a ni. Nikum kum tawp vek khan Arunachalah hmarchhaka a pahnihna turin BJP sorkar a ding ve leh bawk.

BJP general secretary chuan, phaizawl leh tlangrama chengte chuan Congress sorkar an thlawp tawh lo a, sorkar thar an beisei a ni. Chu an beiseina tihlawhtling thei chu BJP party a ni, a ti. Manipur-a Naga mipuite chu Congress sorkar hma­lakna dodaltu an ni, a ti bawk. Sorkar laipui chuan state mipuite tawrhna a hriatpui thu leh kawng hrang hranga hma a lak thu sawiin, nitin mamawh oil, eirawngbawlna gas leh mawmawh dangte thawnluh belh zel turin ruahmanna a siam tih a sawi.

Tunhnaia Manipur 'Iron Lady' Irom Sharmila-i'n BJP-in an party ticket-a ding tur leh, pawisa tam tham tak peka an tiam nia a sawi chuangchang chu dawt niin a sawi ve bawk. Sharmila chuan BJP hian cheng vaibelchhe 36 pek an tiam niin a lo sawi tawh a ni.