Tripura JMC-ten nawrh titawp

Tripura sorkarin Bru raltlante a hlawma Kanchanpur subdivision huam chhunga an inbengbelna tur siamsak a tum duh loh vanga Joint Movement Committee (JMC) in tiam chin awm loa nawrh an huaihawt chu sorkar nena inbiakna an neih hnuah an titawp.

JMC hian ni riat chhung nawrh an huaihawt hnuah nimin aṭang khan an titawp a, JMC converner Sukanta Bikash Baruah chuan Bru raltlante a hlawma dah khawm lo a, hmun hrang hranga sem darh tura an phut chungchang chu a tihhlawhtlin ngei an beisei thu a sawi. 

Bru raltlante Tripura-a an inbengbel tir chu an dodal lo tih JMC chuan an sawi a, mahse Kanchanpur subdivision huam chhunga a  hlawma chhungkaw 5,000 te dah tumna chu an duh lo tih an sawi a ni. JMC hruaitute chuan, "Kanchanpur subdivision-ah a hlawma dah khawm an nih chuan nghawng ṭha lo tak a nei thei dawn a ni. Hei vang hian Bru raltlante hi district pariat leh subdivision hrang hrangah rual khai taka an dah darh kan phut a, hei hi an tihhlawhtlin chuan harsat­na engmah a awm lo ang," an ti. Kanchanpur subdivision-ah Bru raltlan hi chhungkaw 500 aia tam dah lo turin sorkar an phut a ni. State sorkar chuan JMC thil phut hi ngaihtuah ṭhat leh a tum tih a sawi. 

Chief minister Biplab Kumar Deb chuan sorkar chuan a ṭha ber tur a ngaihtuah dawn tih sawiin, mipuite rilru natna thlen zawnga thil tih a tum lo a ni, a ti. 

JMC te nawrh huaihawtnaa security force-te nena a innawr buainaa police-te silai hmehpuahah nawrh huaihawt zinga pakhat a thi a, mipui thinrimin an beih lehnaah fire service mi pakhat a thi bawk. Buaina chhuakah hian  civil mi leh police zingah hliam tuar eng emaw zat an awm bawk. 

Hetih lai hian Tripura People's Front (TPF) chuan JMC nawrh huaihawtnaa mipui thinrimin an beih avanga thi fireman, Biswajit Debbarma chunga thil thleng duh lohna lantirin nimin khan Tripura Tribal Areas Autonomous District Council huam chhungah darkar 12 awh bandh an huaihawt. 

November 21-a JMC-ten nawrh huaihawtnaa Tripura State Rifles sipaite silai hmehpuahah JMC member pakhat a thih avanga mipui thinrimin an beih lehnaah fireman Debbarma hi a thi a ni. Hemi ṭuma thil thlen dan hi chhui chiang turin state sorkar chuan enquiry commission a din tawh a ni. 

TPF worker-te chuan national highway leh rel kawngte an dang a, hei vang hian nimina Agartala aṭanga rel chhuak turte pawh cancel vek a ngaih phah a ni.