Nagaland : CM bang turin nawr zui zel

Nagaland chief mi­nister TR Zeliang chu Nagaland Tribes Action Committee (NTAC) Ko­hima leh Joint Coordi­nation Committee (JCC)-te chuan bang turin an nawr zui zel a, ni li chhung bandh kalpui a ni tawh.

JCC & NTAC-te chuan CM Zeliang-a bang tura an phutna chu an tawpsan mai loh tur thu an sawi a, an thil phut a hlawhtlin hma loh chuan hma an lak zel tur thu a sawi. Minister leh MLA-te chu February 17 ral hma ngeia chief minister an thlawpna hnukdawk turin an ngen tih Thawhlehni khan an sawi. Hetih lai hian CM chuan bang tura an phut dan chu danin a phal bak niin a sawi a, assembly-a member tam zawkte chuan an thlawp thu a sawi. Tribal pawlte nena inbiakna neih a duh thu sawiin, state sorkar chuan remna zawngin hma a lak reng thu a sawi.

Dan hremi Leonard Aier chuan, CM chuan House member tam zawkte thlawpna a neih chhung chuan ban luih tir thei a nih loh thu leh, President’s Rule puan theih a nih loh thu a sawi. Senior Advocate Akito Zhimomi pawhin JCC leh NTAC-te thil phut chu dan kalh a nih thu sawiin, tribal pawlte chuan kawng dik lo an zawh niin a sawi. Urbal Local Body (ULB) election-a hmeichhe tana seat 33% hauhsak tura thutlukna siam vang ngawta cabinet ṭhiah tir tum chu thil atthlak tak a ni, Zhimomi chuan a ti.

Senior Advocate chuan JCC leh NTAC-te chu lungawi lohna lantirnaa nunna chante thih dan chhui chian phut zawk tur leh, inquiry commission din a nih theih nan sorkar nawr zawk turin thurawn a pe bawk.