Assam : Sorkar laipuiin chhawmdawlna Rs vbc 1,000 sanction

Assam chief minister Himanta Biswa Sarma chuan an state-in tuilian vanga chhiatna nasa tak an tawrh mekah, sorkar laipui chuan chhawmdawlna turin Rs vaibelchhe 1,000 a sanction tih a sawi.

Tuilian vang hian state chhung district 27-a mi nuai ruk chuangin harsatna an tawk tawh a, Nilaini khan Darrang district-a tuilianah mi pakhat tlahlumin, kar kalta Zirtawpni aṭanga ruahsur nasa vanga chhiatna thlenga thi hi mi pakua an tling tawh a ni.

Assam State Disaster Management Authority (ASDMA) chuan district hrang hrangah ruahsur nasa avangin lui tui a lian a, kawngpui leh leite a chhia a, school building pawh eng emaw zat a chhe tawh tih a sawi. Hill district, Dima Hasao-ah lei a la min chhunzawm reng a, Thawhṭanni aṭang khan he district hi rel leh kawngpui aṭanga kalpawh theih lohin a awm tawh a ni. District pathum - Cachar, Karimganj leh Hailakandi awmna Barak Valley-ah pawh tuilian hian inkalpawhna a tichhe nasa hle.

CM chuan state chhim lama inkalpawhna kawng chhiate siamṭha turin theihtawp chhuah mek a nih thu leh, sorkar chuan Dima Hasao district tan thlawhtheihna hmangin ei tur metric ton li a thawn tawh thu a sawi.

Tuilianin rel leh motor kawngpuite a tichhiat avangin air ticket man nasa takin a sang nghal a, Silchar leh Guwahati inkar air ticket man chu Rs 30,000 te a tling hman. Hei vang hian sorkar chuan Silchar-Guwahati inkarah special flight, ticket man Rs 3,000-a thlawh tir turin regional carrier FlyBig Airline chu inremna a siampui a ni.

Forest Dept-in Kaziranga-ah ramsate tan highland 40 siam
Assam state-a ruahsur nasa avangin Kaziranga National Park leh Tiger Reserve (KNPTR) bakah national park leh wildlife sanctuary dangah te tui a lian a, hei vang hian Forest Department chuan ramsate awmna tur highland 40 vel an siam tawh.

State forest minister Parimal Suklabaidya chuan tuilian thleng mekah ramsa chhanchhuah leh himna turin forest department chuan theihtawp an chhuah tih a sawi a, highland an siamah hian an ei tur hnim hring leh thei rah chi thingkungte pawh a tam tawk niin a sawi bawk. Highland siam chuan tuilian vanga ramsa thi awm ṭhin pawh a tihziaawm phah ngei a beisei thu a sawi.

Minister hian national park leh wildlife sanctuary-a tuilian dinhmunte chu ngun taka an thlithlai reng thu sawiin, "Kumtinin Kaziranga hian tuilian hi a tuar a, hei vang hian tuilian tuar ramsate chhanchhuah hna thawhna tur leh, official-te tan pawha ei tur ruahman dan turah pawh kan lo inbuatsaih lawk vek a ni," a ti. Forest official-te chuan Kaziranga National Park official-ten thawkdunin, ramsate himna turin chhun zan zawmin an thawk a ni, a ti. Kaziranga-ah hian ramsate chhanchhuah hna thawhna turin lawng 25 chuang hman theih tura dah reng a nih thu a sawi bawk.

KNPTR director, Jatin Sharma chuan park-ah hian highland siamchawp 144 a awm a, heng zingah tuilen laia ramsa te awmna tur highland lian 33 a tel tih a sawi. Highland panna tur kawng km 8.5-a thui siam a ni bawk a ni, a ti.