Tripura police-ten journalist kut thlak Media miten action lak an phut

Tripura-a news channel-a video journalist, Nitali Dey chu police lock-up ah dah a nih laia police-ten tinawmnaha kut an thlak avangin, police-te laka action lak phutin media pawl hrang hrang chuan Agartala-a police headquarters kawtah sit-in protest an nei.

Senior journalist-te leh media body-te chuan journalist kut thlak a nih chungchanga mawh phurtu, police officer chu suspend nghal turin sorkar an phut.

Video journalist Nitay Dey hian Thawhlehni zan khan Agartala khawpui chhunga fuel refilling station hrang hranga fuel indaih lohna thleng mek chu a cover a, heng hmunah hian police-te hi an duty vek a, a cover lai hian police-te nen inhnialin, an inhnialna lo awm tualchhung mi ṭhenkhat pawh inrawlhin Dey hi kut an thlak a ni. IGM Hospital-ah medical exam tura hruai a nih hnuah East Agartala police station lock-up ah dah zui a ni. Lock-up a dah anih lai hian police-te chuan zu in luihtirin, a thawmhnaw an phelh a, kut an thlak zui nia sawi a ni. Pawikhawih lian tham a neih loh bakah a laka complaint thehluh engmah a awm lo chungin lock-up ah hian hren a ni.

Dey hian FIR thehlutin, police duty ten kut an thlak chungchangte tarlangin, police chanchin ṭha lo lamte a tihchhuah avangin police van-a an phurh laite chuan thahah an vau niin a sawi. FIR a thehluhah hian kutthlak leh tinawmnah a nih naah College Tilla outpost officer-in-charge Arindam Roy chu a hmahruaitu ber a nih thu a tarlang.

Chief Judicial Magistrate, West Tripura chuan journalist chunga thil thleng nia sawi chungchangah West Tripura police superintend chu ni thum chhunga report kimchang thehlut turin Nilaini khan a hriattir nghal a ni.