BSF damlo awmin Covid-19 kai vangin NEIGRIHMS hospital khar

NEIGRIHMS hospital-a Orthopedic ward-a BSF sipai pakhat damlo awm chu Covid-19 a kai tih hmuh chhuah a nih avangin hospital hi pawn lam mite tlawh pawh theih loh tura khar rih a ni. 

NEIGRIHMS Director Dr P Bhattacharryya chuan hri kai hi damdawi-ina awm lai a nih avangin hospital pawh damdawi hmanga kah a ngaih thu leh, damdawi-in chhunga awm dangte pawh an inchhui chian a ngaih dawn thu a sawi. 

Dr Bhattacharryya chuan BSF sipai hi Umpling-a mi a nih thu sawiin, July 1-ah Covid-19 test neih sak a ni tawh a, a negative a, hemi hnu hian non-Covid ward, Orthopedics ward-ah admit a ni tih a sawi. Mahse damdawi-ina a awm hnu hian a khua a rawn sik a, July 9-a RT-PCR test neih nawn leh hnuah a result hi a positive a, Covid ward-ah sawn nghal a ni, a ti. 

Hri kai hmuh a nih avangin hospital service, OPD leh emer­gency service thlengin thu leh awm hma chu khar rih a ni. Hemi chungchang hi state health department lam pawh hriattir an ni tawh bawk. BSF headquarters containment zone-ah puang Umpling, Meghalaya-a Border Security Force (BSF) frontier headquarters-a awm zinga sipai 38 chuan Covid-19 an kai tih hmuh chhuah a nih avangin an headquarters pum chu containment zone-ah puan nghal a ni. 

East Khasi Hills district magistrate War Nongbri chuan thupek dang tihchhuah a nih leh hmaa containment zone area-a kaihhruaina hman tur pawh a tichhuak nghal. He zone huam chhungah hian pawn lam mi luh phal a ni lo a, a area chhunga mite pawh hmun danga an chhuah khap a ni bawk. Hei bakah hian containment zone  huam chhunga awm te chu inah tawmim vek tura tih an ni. An huam chhunga dawr, sorkar leh private institution-te khar vek tura tih a ni a, district thuneitute chuan damdawi leh an mamawh dang supply dan tur a ruahman ang. Meghalaya-ah hian tun hnaiah BSF sipai zingah Covid-19 kai hmuh belh zel niin, sipai zinga hri kai  hmuh tawh hi 65 an awm tawh a ni. State chhunga hri kai hmuh chhuah tawh hi mi 142 an ni tawh a, an zinga 95-te chu enkawl mek niin, 45 an dam tawh a, mi pahnihin he hri hi an thihpui tawh bawk a ni.