Nagaland : Chief Minister-in hun pe turin ngen CM thar turin Dr Dr Shurhozelie hming sawi ri

Nagaland Chief Minister, TR Zeliang chuan Nagaland Tribes Action Committee (NTAC) Kohima leh Joint Coordination Committee (JCC)-te'n bang tura an phut chungchangah inngaihtuahna hun pe turin a ngen a, lalṭhuthleng kalsan a hreh loh thu a sawi. Hetih lai hian Zelianga thlak tur hian Naga People’s Front (NPF) president Dr Shurhozelie Liezietsu hming chu sawi rik a ni.

CM Zeliang chuan, "NTAC leh JCC-te chu ni hnih thum vel hun min pe turin ka ngen a ni, thuneihna inthlak thleng tur chuan hun kan mamawh a ni" a ti. Chief minister aṭanga ban a hreh loh thu leh, rorel lai Naga People’s Front (NPF) MLA Dr Shurhozelie Liezietsu chu lalṭhutthleng ken a hreh loh thu Ningani khan a sawi. NPF president ni lai leh, DAN Chairman ni bawk, Dr Liezietsu chu chief minister ni thei tura rinkai ber a ni rih a, rorel lai NPF MLA 38 chuan an thlawpna an lantir tawh a ni. Parliamentary Affairs minister, Kiyaneilie Peseyie chuan Dr Shurhozelie chu chief minister ni turin an party chuan an pawm tawh tih a sawi bawk.

Parliamentary Affairs minis­ter chuan CM Zeliang chuan banna a la thehluh loh thu sawiin, hun rei loteah Dr Shurhozelie chu hmun a ken ngei a beisei thu a sawi. Zeliang-a hi Zirtawpni khan Delhi aṭangin Nagaland-ah a let leh tawh a, tlaiah sorkar mi pawimawhte nen meeting an nei leh ngal a ni. Meeting-ah hian NPF MLA 38 bakah, Independent MLA-te an tel a ni. Parliamentary Secretary for IPR, Khekaho Assumi chuan Dr Shurhozeliechu meeting-a tel te chuan, chief minister atan lungrual takin an pawm tih sawiin, CM thar tur chu official-a puanchhuah thuai a nih tur thu a sawi.

PHE Minister Tokheho Yepthomi chuan, CM Zeliang chuan lalṭhuthleng kalsan a remti niin a sawi bawk a, hun rei loteah thutlukna puan chhuah a nih tur thu a sawi. Rajya Sabha MP, KG Kenye chuan CM leh Governor-te chuan Delhi an pan thu sawiin, Ministry of Home Affairs dawr tura an fehchhuah thu sawiin, Zeliang chuan a nihna kalsan a remtih tawh thu a sawi bawk. Rajya Sabha MP chuan, NPF member-te chuan chief minister atan Dr. Shurhozelie an pawm tlan thu a sawi bawk.

NPF kaihhruai Democratic Alliance of Nagaland (DAN) sorkar chuan boruak a pangngai chhoh ṭan thu sawiin, President’s rule puan a nih loh tur thu an sawi. Hetih lai hian Governor P.B. Acharya leh Zeliang-te chuan Ningani khan Dimapur chhuahsanin New Delhi an pan a, Prime Minister Narendra Modi leh Union Home Minister Rajnath Singh-te an dawr hnuah, nimin khan Nagaland-ah an let leh a ni.

NTAC hruaitu K.T. Vilie pawhin Zeliang-a ngenna anga ni hnih thum vel an ngaihchan tur thu sawiin, banna a thehluh ngei pawh an rin thu a sawi. NTAC leh JCC-te chuan bandh an huaihawt chu an la kalpui zel a, Nilaini khan chief chif minister chu bang turin na zawkin an nawr a, nimin khan kawngzawh huaihawt lehin, hun tiam ral hma ngeia bannaa thehlut turin an ngen. Nimin khan chief minister bang tura hun an pek tawp ni chu a ni.

Nagaland assembly-ah hian seat 60 a awm a, NPF kaihhruai rorel lai Democratic Alliance of Nagaland chuan MLA 48 neiin, Bharatiya Janata Party (BJP) pali leh, Independent MLA pariat an awm.

Uraban Local Body (ULB) election-a hmeichhe tana seat 33% hausak duh lohna, tribal pawl hrang hrangten an lantir avang hian Nagaland sorkar chu a talbuai hle a, mipui nawlpui nunphung pawh a khaihlak nasa hle. Hetiang boruak a awm mek lai hian NPF MLA, Neiphrezo Keditsu chuan Nagaland State Mineral Development Corpo­ration Limited-a Chairman a nihna chu a bansan thu a sawi a, Dimapur police leh nawrh huaihawttute innekbuainaah khan an khaw mi leh sain nunna a chan avangin a bang tih tarlan a ni.