Tripura-ah nawh huaihawt vangin nunphung khaihlak

Tripura-a Gandacherra sub-division huam chhungah Ningani khan nawrh huaihawt a ni a, nunphung a khaihlak phah hle.

February 8 khan sor­kar laipuiin Citizenship (Amendment) Bill, 2016 a pass duhlohna lantirin Tripura hmun hrang hrangah nawrh huaihawt a ni a, hemi ṭuma state police-te chetdan duh lohna lantir hian, Tribal party-te chuan nawrh hi an huaihawt leh ta tih an sawi. Nawrh huaihawt hian darkar 48 a awh a ni. Police-te chuan nawrh huaihawt a nih vang hian sorkar office, zirna-in leh sumdawnna hmunte khar a nih thu an sawi.

Indigenous People’s Front of Tripura (IPFT)-te chuan February 8-a nawrh huaihawt a nih ṭum khan civil mi police kut tur mi 50 vel zet an awm niin an sawi a, an zinga ṭhenkhat chu an ngaihtuahawm hle niin an sawi. Hetihlai hian tunkar Nilaini zan khan Tripura State Rifles (TSR) mi leh sa-te chu IPFT member-te'n an bei a, mi eng emaw zatin hliam an tuar nia tarlan a ni.

Ningania nawrh huai­hawtah hian boruak duhawm loh thleng a awm hriat a ni lo a, Border Security Force, Central Reserve Police Force leh Assam Rifles-te chuan venhim hna an thawk a ni. Citizenship (Amendment) Bill, 2016 duh lohna hi opposition party - Indigenous National Party of Triupura (INPT), IPFT leh National Conference of Tripura (NCT)-te'n Tripura Tribal Areas Autonomous District Council (TTAADC)-ah an huaihawt a ni.