Assam tuilianin ziaawm lam la pan thei lo
Assam-a ruahsur nasa avanga tuilian chuan ziaawm lam a la pan thei lo a, district tam zawkah leimin avangin harsatna a thlen bawk.
Tuilian vang hian district 27-ah mi nuai sarih chuangte'n harsatna an tawk a, ruahsurin chhiatna a thlenah mi 10 an thi tawh bawk a ni.
Assam State Disaster Management Authority (ASDMA) chuan tuilian hi khaw 1,413 in an tuar mek tih sawiin, Nagaon district bikah mi nuai 2.88 ten harsatna an tawk a, Cachar-ah nuai 1.2 leh Hojai-ah mi nuai 1.07 ten harsatna an tawk tih a sawi.
Heng bakah hian Bajali, Baksa, Barpeta, Biswanath, Bongaigaon, Charaideo, Darrang, Dhemaji, Dibrugarh, Dima Haso, Goalpara, Hailakandi, Kamrup, Kamrup Metropolitan, Karbi Anglong West, Karimganj, Kokrajhar, Lakhimpur, Majuli, Morigaon, Nalbari, Sonitpur, Tamulpur leh Udalguri district-ten tuilian hi an tuar mek a ni.
District 14-ah relief camp leh distribution centre 248 siam a ni tawh a, camp-ah hian tuilian tuar mi 48,304 khawsa mekin an zingah naupang 6,911 an tel.
Sorkar chuan tuilian tuarte chhawmdawlna atan hian buhfai leh dal quintal 2,264.2, tel litre 5,977.48, bawng chaw quintal 2,393.84 bakah thil dang eng emaw zat an sem tawh tih an sawi.
ASDMA bulletin chuan Indian Army, paramilitary force, NDRF, SDRF, trained volunteer, fire and emergency service leh tualchhung mite chuan hmun hrang hrangah tuilian tuarte chhanchhuah hna hi thawkin, lawng leh helicopter hmangin mi 8,062 chu hruaichhuah an ni tawh tih a tarlang.
Hailakandi leh Dima Hasao district-ah lei a min thar leh a, thuneitute chuan leimin tuartute tan hian relief camp an siam nghal bawk.
Tuilianin hmun tam takah rel kawng a tihchhiat avangin Northeast Frontier Railway (NFR) chuan Lumding-Badarpur Hill Section kaltlanga Barak Valley, Tripura, Mizoram leh Manipur-a rel service chu a titawp chhunzawm zel a, kawng chhia siamṭhat hna hi thawh mek a ni.
AP-in tuilian leh leimin tuar
Assam ṭhenawm, Arunachal Pradesh-ah pawh ruahsur nasa avangin district eng emaw zatin tuilian leh leimin an tuar.
Ruahsur vangin Lower Subansiri district-a leimin nasa tak a thleng a, mi tam tak chu himna zawngin an tlanchhia a ni. Lohit district-a Tezu khuaah tuilianin in 10 chuang a chim chhe tawh bawk. Tezu Nallah leh Lohit luite chuan ni hnih chhung hlauhawm chhinchhiahna an pel tawh bawk a ni. Itanagar-ah pawh kawng chhia, leimin, chirh tawlh leh tuilian ten hmun hrang hrangah harsatna a thlen bawk.