Nagaland: Governor-in President a dawr CM-in PM leh HM hmu dawn

Nagaland Governor P B Acharya chuan kar kalta Zirtawpni khan President Pranab Mukherjee chu an state-in harsatna a tawh mek chung­changah a dawr.

Governor Acharya hian Naga­land Tribes Action Committee (NTAC) leh Joint Coordination Committee (JCC)-te'n chief minister TR Zeliang-a bang tura an phut chungchang a sawipui. CM T R Zeliang hian Ningani khan Prime Minister Narendra Modi leh Home Minister Rajnath Singh-te dawr turin New Delhi a pan a ni. Nagaland-a rorel lai Naga People’s Front (NPF) chuan tun hnai khan meeting neiin, TR Zeliang-a thlak turin Dr. Shurhozelie Liezietsu chu a ruat nia tarlan a ni.

Chief Minister office thu­chhuah chuan, Zeliang leh Acharya-te chuan New Delhi an pan thu sawiin, President’s Rule puan a nih lohna turin hma an la mek niin a tarlang. Nagland-ah hian NTAC leh JCC-te chuan cabinet meeting-in Urban Local Body (ULB) election-a hmeichhe tana seat 33% hauhsak tura thutlukna siam a nih chungchangah CM Zeliang-a chu mawhphurtuah puhin, bang turin nasa takin an nawr mek a ni. Hun eng emaw chen bandh huaihawt a ni tawh a, hei hian nunphung a tikhaihlak hle bawk.

Hetiang boruak a awm mek lai hian, TR Zeliang chuan nimin khan chief minister a nihna aṭanga ban a remti nia tarlan a ni. Zelianga thlak tur hian Lok Sabha MP Neiphiu Rio leh Naga People’s Front (NPF) president Dr Shurhozelie Liezietsu-te hming sawi rik an ni. NPF MLA 49 leh Independent MLA-te chuan CM thar tur hian Neiphiu Rio an thlawp nia sawi a ni. TR Zeliang hian Zirtawpni khan President leh Prime Minister-te a dawr hnuah, Rio nen hian Inrinni khan New Delhi aṭangin Dimapur an pan dun nia tarlan a ni bawk.

Nagaland MLA eng emaw zat chu Assam-a Kaziranga camp-ah an awm mek a, heng mite hi Rio hian a tlawh nia sawi a ni bawk. Rio chuan, MLA-te a tlawh hnuah thutlukna a siam tur thu sawiin, hun rei loteah Chief Minister chungchang chu chinfel a ni thuai dawn tih a sawi. NLA Speaker Chotisuh Sazo, Minister for Parliamentary Affairs Kiyanilie Peseyie, MLA Kuzholuzo, Khriehu Liezietsu, Vikho-O Yhoshu leh PHE Minis­ter Tokheho Yepthomi-te pawhin Rio dawr turin Kaziranga an pan dawn a ni. Hetih lai hian BJP MLA P. Paiwang Konyak, Imtilemba Sangtam, Dr TM Lotha leh Mmhonlumo Kikon-te erawh chuan camp hi an zawm ve lo a ni.

Nagaland-ah hian tribal pawl hrang hrangte chuan chief minister bang tura phutin bandh an huaihawt mek a, hei hian zirlai exam hmachhawn mek te erawh a huam lo. CM Zeliang chuan bang tura an phutna hi a pawm tawh nia sawi a ni a, ni hnih thum vel nghak rih turin a lo ngen tawh bawk.