Assam-a Medical College din nan Rs vbch 570 ruahman

Assam Health minister Himanta Biswa Sarma chuan medical college leh hospital dinna turin cheng vaibelchhe 570 ruahman a nih thu leh, kum thum chhunga zawhfel hman tura ruahman a nih thu a sawi.

Health minister Sarma chuan, Medical college leh hospital-te hi Dhubri, Nagaon leh Lakhimpur-ahte din a ni dawn tih sawiin, sum pawh ruahman fel a nih tawh thu a sawi. A senso 90% chu sorkar laipui tum tur a nih thu leh, a bak 10% chu Medical Council of India (MCI) tum tur a nih thu a sawi. Hemi bakah hian hospital din belhna turin state sorkar chuan cheng vaibelchhe 40-45 vel a ruahman tih a sawi bawk.

Union Health Minister J P Nadda chuan Dhubri leh Nagaon-a hospital sakna tur lungphum chu a phum a, khum 500 awm thei tura duan a ni. Dhubri-a Medical College leh Hospital dinna tur pawh ruahman fel a ni tawh a, Lakhimpur-ah pawh ram lei fel a nih tawh tih tarlan a ni.

Minister Sarma chuan, Diphu-a Medical College leh Hospital din tur chu kumin chhungin sak zawh hman beisei a nih thu sawiin, Changsari-a AIIMS sak mek pawh hawn thuai beisei a ni , a ti. Union Health Minister Nadda hian vawiin hian Assam-a speciality cancer hospital, Gauhati Medical College and Hospital hnuaia din chu a hawn tur thu a sawi bawk. Cancer hospital sak hna hi kum 2009 khan ṭan a ni a, a sak nan hian state sorkar chuan cheng vaibelchhe 85.78 a seng a ni. Heng bakah hian State Cancer Hospital sakna turin cheng vaibelche 120 ruahman a nih thu Health Minister Sarma chuan a sawi bawk.

J.P. Nadda pawhin Assam-a Medial College dinna turin sorkar laipui chuan cheng vaibelchhe 756 a ruahman fel tawh tih Zirtawpni khan a sawi. Nadda hian Zirtawpni khan Dhubri district-a medical college sak thar chu a hawng a, Nagaon district-a medical college sakna tur lungphum a phum bawk. He hunah hian sorkar laipuiin medical college din belhna tur sum a ruahman sak thu hi a sawi a ni. Union Minister hian ni hnih chamin Assam a tlawh a, a cham chhung hian sorkar mi pawimawh eng emaw zat meeting a neihpui a ni. Assam-ah district tinah Hospital din a nih tur thu sawiin, community health centre leh primary health centre eng emaw zat din belh tum a nih thu a sawi.

Union Minister hi Assam Chief Minister Sarbananda Sonowal chuan thinlung taka an lo lawm thu a sawi a, state hmasawnna kawnga thawh dunpui zelah a sawm bawk.