Meghalaya Assembly building sak laia dome a chim

Meghalaya Legislative Assembly building sak laia dome chu nimin zing khan a chim.

Legislative building thar tur hi New Shillong Township-a Mawdiangdang-ah sak niin, ram acre 80-ah sak a ni. Buiding sak hna, Rs vbc 127 project hi Uttar Pradesh-a Rajkiya Nirman Nigam Ltd-in a thawk a ni.

Building-a a chung mum, dome hi tun hnai maia vuah a ni a, a structure hlankaina tura crane hi Chennai aṭangin lakluh niin, thla khat leh chanve vel zet lakluhna atan hun an hmang a ni.

PWD (Building) executive engineer, Ransom Sutnga chuan dome chim chhan hi a design vang niin a sawi a, dome hi a rit tham a, a in nghah chhan hian a zo lo a ni, a ti. Dome hi meter 65-a sang niin minar hi meter 13 a ni a, dome rih zawng hi ton 70 vel a tling a ni. Dome chim thenfaina atan hian kar hnih vel zet hun an hman a ngai dawn nia sawiin, thla 8/9 chhungin dome design thar, a hma aia zang zawk hi siam a nih tur thu official chuan a sawi bawk.

Meghalaya Legislative Assembly building thar tur hi kum 2019, June thla aṭanga sak ṭan a ni. Meghalaya sorkar chuan he building sakna tur hian budget estimate, Rs vbc 145 a siam a, mahse an ruahman aia hniam zawkin, Rajkiya Nirman Nigam Ltd hnenah Rs vbc 127 -in contract hi pek a ni.