Agartala khawpui chhunga tui tling ngaihven hmasa turin ti

Tripura urban development minister hlui, Manik Dey chuan state sorkar chu ruahsur nasa vanga an state khawpui, Agartala-a khawpui chhunga tui tling nasa lutuk chu ngaihven hmasa turin a chah.

Minister hlui leh CITU hruaitu Dey hian Agartala Municipal Corporation mayor Deepak Majumder leh state urban development department-te chu tui tling avanga khawpui chhunga harsatna thlengte chinfel dan ngaihtuaha theihtawp chhuaha hma la turin a chah.

Hemi rual hian state sorkar chuan khawpui chhunga tuiin kawngpui hrang hrang a chimte en a, thla lakpui ringawt loin, hna tak tak thawk zawk turin a ti bawk.

Dey chuan, "Agartala Municipal Corporation mayor thar chuan khawpui chhunga tui tlinna chhan chu Agartala khawpui tan tlangtu, Howrah lui a len vang niin a sawi. Hei hian khawpui awmdan a hriatchain loh zia a tichiang hle a ni. Howrah lui hi lian ni se chuan tun ai hian dinhmun a chhe zawk ang. Howrah lui a len chuan Chandrapui kaltlangin Agartala-ah a lu t ang a, khawpui pum hi tuiin a chim mai dawn a ni," a ti.

Khawpui chhunga tui paihna hmunte chu felfai tawk lo a, hei hian tui luang chhuah thei loin tui nasa takin a tlin phah ta tih Dey chuan a sawi. Left Front-in sorkarna an siam lai khan sorkar laipui aṭangin drainage system siamṭha turin project eng emaw zat sanction a ni, heng project kaltlang hian tui paihchhuahna turte hi ṭha zawka siam tura hma lak a ni, a ti. Tuna BJP kaihhruai sorkar chuan Tripura Urban Development Project fund tihniamah a puh bawk.