Assam-ah tuilian vanga thi mi 18 tling tawh

Assam-ah ruahsur nasa avanga tuilian leh leiminin chhiatna a thlena thi chu nimin, Pathianni thleng khan mi 18 an tling tawh.

Assam State Disaster Mangament Authority (ASDMA) in data a tihchhuah tharah, tuilian vanga thi hi mi 13 niin, a bak chu leimin vanga thi an ni.

District 32-a khaw 3,246-ten tuilian hi an tuar a, district parukah leimin vangin harsatna nasa tak an tawk bawk. Tuilian hian thlai chinna ram hectare 1,00,732.43-a zau a tichhe tawh bawk.

SDRF, NDRF leh volunteer-te chuan tuilian tuar mi 24,749 an chhanchhuak tawh a, relief camp 499 leh relief distribution centre 519 siam a ni tawh bawk, relief camp-ah hian mi 92,124 an awm mek a ni.

Nagaon district chu tuilian tuar nasa ber niin, district chhunga cheng mi nuai 3.39-ten harsatna an tawk a, Cachar district-in dawtin mi nuai 1.77 leh Hojai district-a mi 70,233 ten tuilian hi an tuar mek a ni.

ASDMA chuan state chhung hmun hrang hrang aṭangin tuilian leh leiminin kawngpui, lei , in leh infrastructure dang a tihchhiat thu hi an la dawn belh zel tih an tarlang.