Nagaland : CM thar atan Shurhozelie Liezietsu thlang

Nagaland Chief Minister TR Zeliang-an banna a thehluh hnuah rorellai, Democratic Alliance of Nagaland (DAN) chuan CM thar turin National People's Front (NPF) president Shur­hozelie Liezietsu chu nimin khan an thlang nghal.

Nagaland Chief Mi­nister T.R. Zeliang chuan tribal pawl ten bang tura hun rei tak chhung an nawr hnuah, Pathianni khan Governor P.B. Acharya hnenah banna a thehlut. Governor chuan CM banna hi a pawmsak nghal a, mahse chief minister thar tur ruat fel a nih hma chu a hna lo la chelh rih turin a ngen. CM thar tura thlan, Liezietsu hian a kaihhruai sorkar din a nih theih nan Governor pawh hmuh thuai a tum.

CM Zeliang hi Nagaland Tribes Action Committee (NTAC) leh Joint Coordination Committee (JCC)-te chuan Urban Local Body (ULB) election-a hmeichhe tana seat 33% hauhsak tura thutlukna siam a nih chhanah mawhphurtuah puhin, chief minister a nihna aṭanga bang turin nasa takin an nawr a ni. Kum 2016 khan Nagaland cabinet meeting chuan ULB election-a hmeichhe tana seat 33% hauhsak hi a lo remti tawh a, mahse hei hi a tir aṭangin nasa takin tribal-te chuan an dodal.

Zeliang hian kar kalta Ningani khan President Pranab Mukherjee, Prime Minister Narendra Modi leh Union Home Minister Rajnath Singh-te dawr turin New Delhi a pan a, Pathianni khan Kohima-ah a leh let a ni. Zeliang hi rorellai Democratic Alliance of Nagaland (DAN)-a senior cabinet minister eng emaw zatin an ṭawiawm. Kohima-a an let leh hnu hian Governor hnenah Zeliang chuan banna a thehlut ta a ni.

Nimin khan Zeliang hian Naga People’s Front (NPF) MLA-te chu emergency meeting a neihpui a, hemi hnu hian rorellai Democratic Alliance of Nagaland (DAN) MLA-te chu meeting a neihpui leh bawk. DAN MLA zinga 58 chuan CM thlaktu atan hian Liezietsu an thlawp tih an sawi. February 15 khan MLA 42 chuan Liezietsu hi legislature party hruaitu atan lungrual takin an lo thlang tawh bawk.

Nagaland CM thar atana thlan, Liezietsu hi kum 81 mi a ni tawh a, kum 2013 assembly inthlanah khan a bial, Northern Angamai-I ah chuh tawh loin a aiah a fapa, Kriehu a dintir a ni. Mahse CM atana thlan a nih leh tak avangin a fapa hian assembly member atana thlan a nih theih nan a seat hi a pa a ken leh rin a ni.

Liezietsu hi kum 2003 assembly inthlanah khan a ṭum khatna atan MLA-ah thlan tlin a ni a, urban development minister atan dah a ni a, kum 2008 inthlanah khan a bial ngaiah chak lehin, higher and technical education chantir a ni. Mahse kum 2013 inthlanah khan a chuh lo a, mahse rorellai Democratic Alliance of Nagaland (DAN) ṭangrual sorkarah chairman a ni zui zel a, cabinet status pek a ni. A fapa Khriehu hi Advisor youth resources and sports and Music Task Force-ah dah a ni.