Nagaland zirlaiten DoNER Minister puihna ngen

Nagaland zirlaite chuan kar kalta Zirtawpni khan, Development of North Eastern Region (DoNER) minister Jitendra Singh an hmu a, an state-ah boruak muanawm tak a awm thuai theih nan hma lak pui turin an ngen.

Zirlaite hian DoNER minister hnenah hian Naga mipuite harsatna tawh hrang hrangte an thlen a, buaina chinfel a nih thuai theih nan leh, dan leh thupek mumal zawka kenkawh a nih thuai theih nan hmalakpui turin an ngen a ni. Tribal pawl hrang hrangten state sorkar-in Urban Local Body (ULB) election-a hmeichhe tana seat 33% hauhsak tura thulukna a siam duhlohna lantir avanga mipuite chunga tawrhna thleng chu pawi an tih thu leh, tun hnuah chuan thleng tawh lo se an duh thu an sawi. Police-te leh nawrh huihawtte inkara buaina chhuak avanga nunna chan an awm chu pawi an tih thu Jitendra Singh chu hrilhin, an chhungte hnenah zángnadawmna pek ngei an phut thu an sawi bawk.

DoNER minister chuan zirlaite ngenna chu a ngaihpawimawh thu leh hma lak pui an nih tur thu a lo hrilh a ni. Remna leh muanna chu thil pawimawh tak a nih thu sawiin, buaina tisosang thei zawnga che lo turin mipuite a ngen thu a sawi bawk. Zirlaite hi School of Agricultural Sciences and Rural Deve­lopment (SASARD), Med­ziphema, Nagaland-a zirlai ṭhenkhatte an ni.