Manipur buaina-ah Congress mawhphurtu an ni: Rajnath Singh

Union Home Minister Rajnath Singh chuan, United Naga Council (UNC)-te'n thla thum chuang Manipur-a National Highway (NH) an danchah chhanah Congress party chu mawhphrutu an nih thu Pathianni khan a sawi.

Union Minister Rajnath Singh chuan, Manipur-a Congress kaihhruai sorkar chu dan leh thupek kenkawh kawngah a hlawhchham hle tih sawiin, mipuiten harsatna tawh chingfel thei loah a puh. Tiam­chin awm loa Manipur chakkhai lamna kawngpui pawimawh dan chah a ni chu pawi a tih thu sawiin, sorkar laipui chuan theih tawpa hma a lak thu a sawi. Manipur sorkar chu UNC-te nena inremna a awm theih nana inbiakna neihpuiah a sawm tawh thu sawiin, tun thleng buaina chinfel a la ni lo chu a pawi hle a ni, a ti. State sorkar ngenna ngai pawimawha sorkar laipuiin central paramillitary force ṭhahnem tak a tirhluh thu a sawi bawk.

Rajnath Singh hian Manipur assembly election neih tura BJP 'Vision Document' chu a tlangzarhnaah heng thu hi a sawi a ni. BJP hruaitu chuan, dan leh thupek kenkawh chu state sorkar mawhphurhna a nih thu sawiin, UNC-te'n NH an danchah tirh pawha Manipur CM Okram Ibobi Singh a biak thu leh, thurawn eng emaw zat a pek thu a sawi. BJP chuan Manipur a ngaihthah lo tih sawiin, buaina an tawh mek chuangchangah pawh nasa taka hma an lak thu a sawi. Hetih lai hian rorellai Congreess party chuan BJP chu a thawhpui ṭha lo tih sawiin, buaina chinfel a la nih loh chhan pawh niin a sawi bawk.

UNC-te hian Manipur sorkarin Jiribam leh Sadar Hills-te district-a hlangkai tura thutlukna a siam duh lohna lantirin, nikum November 1 ṭang khan NH hi an dang ṭan a ni. NH danchah a nih hnu hian state cabinet chuan district thar pasarih din turin thutlukna a siam leh a, hei hi Manipur-a cheng Naga mipuite chuan nasa takin an dodal a ni.