Arunachal-Assam border buaina 2023-ah chinfel a ni ang : Amit Shah

Union home minister Amit Shah chuan Arunachal Pradesh leh Assam-ten ramri chungchanga buaina an neihte kum 2023-ah chinfel hman beisei a nih thu a sawi.

Kar liamta kartawpa Tirap district-a Ramakrishna Mission School golden jubilee lawmna a hmanpuinaah Amit Shah chuan he thu hi a sawi a, "Meghalaya leh Assam ramri buaina neih pawh 60% chuang chu chinfel a ni tawh. Arunachal Pradesh leh Assam ramri buaina pawh kum 2023 ral hmain chinfel hman ngei kan tum," a ti. Assam leh AP ramri hi km 804-a thui a ni.

Amit Shah chuan hmarchhak chu hel awmna hmuna siam tuma hma lak mek anih thu te, hmarchhaka biala hmasawnna leh boruak muanawm awmna tura sorkar laipuiin theihtawp a chhuah thute a sawi bawk.

Union Home Minister chuan central-a prime minister Narendra Modi kaihhruai sorkar a din aṭangin, kum riat chhungin hmarchhak bialah hel 9,000 chu sorkar kutah an inpe tawh tiha sawi. "Hmarchhak ṭhalaite chuan silai leh petrol bomb-te keng tawh loin, tunah chuan laptop nen eizawnna tur kawngte an insiam mek zawk a ni. Hei hi sorkar laipuiin hmarchhak tana hmasawnna tur a lo mitthla ṭhin chu a ni," a ti.