Tripura CM hlui hamṭhatna pek danah Congress hruaituin Tripura High Court-ah PIL thehluh tum

Tripura Congress hruaitu, minister hlui Sudip Roy Barma chuan an state-a rorellai, BJP sorkar chuan chief minister hlui, Biplab Kumar Deb chuan CM aṭanga a ban hnuah CM hnena hamṭhatna pek ang zawng zawng a hmang zui zel niin a puh.

Sudip Roy Barman chuan Chief Minister ni lai chauhin a hman tur ang thilte chu Deb hian a hmang chhunzawm reng nia sawiin, mipuite sum pekkhawm chu dik lo takin Deb hian a hmang a ni, a ti. Hei vang hian Tripura High Court-ah public interest litigation (PIL) thehluh a tum tih a sawi bawk.

Barma chuan, "CM kalna tur ang chi ah Deb hi a kal chhunzawm reng a, hei pawh hi sorkar sum tumsak vek a ni. Hei hi dik lo taka thiltihna a ni. CM a ni tawh lo. Tuna kan CM, deputy CM leh midangte hi hetianga a tih theihna chhan hi ka zawt duh a ni. Kan CM nilai hi CM hluiin a duh dan dana thunun leh a kawhkawi theih mai mai tihna em ni?," a ti.