Vawiinah Nagland CM atan Shurhozeilie la lut dawn

Nagaland Chief Minister 17-na ni turin Dr. Shurhozeilie Leizietsu chu vawiin hian rinawmna thu tiam tirin, Governor P.B. Acharya chuan a la lut dawn.

Kum 81 mi Dr. Shurhozeilie hi Naga People’s Front (NPF) president ni lai a ni a, NPF MLA-te chuan Thawhṭanni khan chief minister atan an thlang a ni. Chief Minister T.R. Zeliang chuan Pathianni khan Governor hnenah banna a thehlut a, pawm a nih hnuah amah thlaktu atan Dr. Shurhozeilie hi thlan a ni ta a ni. Chief Minister thar lak luh rual hian council of minister turte chu lak luh nghal dawn niin Raj Bhavan official chuan a tarlang.

CM thar tur Shurhozelie chuan, Naga mipuite tana a theihtawp chhuaha hna a thawh tur thu sawiin, lungrual taka hmalam pana an kal zel tur thu a sawi. State chhunga hnam hrang hrangte inpumkhatna chu a ngaih pawimawh thu sawiin, inunauna neih a ṭul tak zet a ni, a ti. Sorkar hmalakna dodal zawnga chetna chu hmasawnna daltu lian tak a nih thu leh, sorkar laka lungawilohna lantir a nih chhunga an state economy-in a tawrh phah chu pawi a tih thu a sawi.

Rajya Sabha MP, K.G. Kenye chuan Shurhozelie chu MLA-te'n lungrual taka an thlan thu sawiin, Democratic Alliance of Nagaland (DAN) chuan CM thar ṭha tak an nei dawn niin a sawi. DAN chu mipuite thlan sorkar a nih ang ngeiin, Shurhozelie-a kaihhruaina hnuaiah pawh mipuite tan theihtawp chhuaha hna an thawh zel tur thu a sawi a, Independent MLA pariat leh BJP MLA pali-te chuan DAN sorkar an thlawp a ni, a ti. Banna thehlut ta TR Zeliang pawh DAN Co-ordination Committee Chairman atan thlan a nih thu a sawi bawk.

Chief minister ni thei tura hming sawi lan zinga mi, Lok Sabha MP Neiphiu Rio chu NPF MLA-te chuan an party leader atan an thlang dawn nia tarlan a ni. CM tur thlan fel a nih hma khan Rio chuan TR Zeliang-a a lo hmuh tawh bakah, NPF MLA-te chu Assam-a Kaziranga National Park-a camp an neihna hmunah vawi eng emaw zat a hmu tawh a ni. Rio hian kum 2015 khan CM nihna a lo chuh tawh a, mahse nikum khan NPF chuan an party aṭangin an suspend a, ani bakah Home Minister hlui Imkong Imchen pawh party thil tiha tel thei lo turin an lo hrem tawh a ni.

Vawiina Nagland chief minister atana lakluh tur Shurhozelie hi Nagaland assembly member hlun tak a ni a, Northern Angami assembly constituency aṭangin ṭum riat thlan tlin a ni tawh. Kum 2013-a assembly khan a kum a tam deuh tawh avangin a chuh lo a, a hmun chu a fapa Khriehu Leizietsu tan a kian a ni. Khriehu hi parliamentary secretary ni mekin, sports, Music Task Force leh state lottery-te a enkawl a ni. Mahse a pa Shurhozelie hi MLA atan thlan a ngaih avangin a hmun a kian dawn a ni.

Hetih lai hian Naga Student’s Federation chuan, January 31 aṭanga internet leh mobile service tihtawp chu dan pangngaia mipui hman theiha dah leh tawh turin sorkar an phut tih an sawi. State sorkar laka tribal-te'n lungawi lohna lantira tharum thawhna a thlen hnu khan, internet leh mobile service-te chu tihtawp lailawk a lo ni tawh.