Assam-ah question putru vangin HSLC exam hun sawn

Board of Secondary Education, Assam (SEBA) chuan HSLC/AHM exam neih mekah, question putru a awm vangin exam hun sawn hlat a nih thu Thawhṭanni khan a tarlang.

SEBA hnuaia exam kalpui mekah Social Science leh Assamese paper question-te chu Hojai leh Baksa district-ahte a putru a, hei vang hian exam hun hi February 23 leh March 7-a neih turin sawn hlat a ni. He thil thleng hi chhui chian a nih tur thu an tarlang bawk. Social Science hi February 23-a exam tura tih a ni a, March 8-ah sawn hlat a ni ta a ni. SEBA hnuaiah hian zirlai nuai li vel zetin HSLC/AHM exam hi an hmachhawn a ni. SEBA secretary Kamal Jyoti Gogoi chuan he thil thleng hi pawi a tih thu sawiin, mawhphurtute chu zawn chhuaha hremna pek ngei an nih tur thu a sawi.

Hojai leh Baksa district-a exam hmachhhawn zirlaite chuan question paper-ah rinhlelh an neih avangin police station-ah an zualko a, hemi hnu hian thil dik lo a awm tih hriat chhuah a ni ta a ni. Hetih lai hian thuneitu lam chuan question paper hawn a nih hnuah thil dik lo a awm tih an hre chauh niin an sawi thung. Hethil thleng chaungchangah hian zirlaite chuan Education minister Himanta Biswa Sarma chu inrawlh tur leh, ngaihdam dil turin an phut.