Nagland Chief Minister atan Shurhozelie la lut

Naga People’s Front (NPF) president Dr. Shurhozelie Lie­zeitsu chu nimin khan Nagland Chief Minister 17-na atan lakluh a ni a, a rual hian cabinet minister 11 lakluh an ni bawk.

Chief minister lakluhna inkhawm hi Raj Bhavan-ah neih a ni a, Governor P.B. Acharya chuan rinawmna thu tiam tirin a la lut a ni. Kum 81 mi Liezietsu rual hian cabinet minister 11-te chu rinawmna thutiam tira lakluh an ni bawk. Liezeitsu hi Legislative Assembly-ah member a nih loh avangin, office a luah aṭanga thla ruk chhungin by-election buatsaih a ngai dawn a ni. Rorellai Democratic Alliance of Nagaland (DAN) chuan chief minister atan Liezeitsu hi Thawhṭanni khan an thlang a, Naga People’s Front (NPF) MLA, BJP leh Independent MLA-te chuan an thlawp a ni.

Liezietsu hian chief minister kalchhuak ta TR Zeliang-a a thlak a, Nagaland Tribes Action Committee (NTAC) leh Joint Action Committee (JJC)-te'n nasa taka bang tura an nawr hnuah Zeliang hian Pathianni khan banna a thehlut a ni. Zeliang hi Urban LOcal Body (ULB) election-a hmeichhe tan seat 33% hauhsak tura thutlukna siam a nih chungchanga mawhphurtuah puhin, tribal pawl hrang hrangte chuan bang turin an phut a, sorkar laipuia hruaitu lawkte a dawr hnuah banna hi a thehlut ta ni. Shurhozelie Liezeitsu hi Education minister a lo ni tawh ṭhin a, Compact Area Development Scheme duanna kawngah a thawh hlawk hle a ni. NPF president nilai a ni a, DAN sorkarah chairman a ni bawk. Ṭum riat zet MLA atan thlan tlin a lo ni tawh bawk.

Cabinet Minister atan lakluhte chu - Kiyanilie Peseyie, Yanthungo Patton, P. Longon, C. Kipili Sang­tam, C.L. John, Yitachu, Paiwang Konyak, Vikheho Swu, Chotisuh Sazo, Imkong L. Imchen leh G. Kaito Aye-te an ni. Imkong L. Imchen leh G. Kaito Aye-te tih loh hi chu TR Zeliang-a hnuaia minister ni sa te an ni.