UNC nena inbiakna nei turin kan inpeih : Manipur CM
Manipur Chief Minister Okram Ibobi Singh chuan sorkar laka lungawi lohna lantir mek, United Naga Council (UNC) nena inbikna nei tura an inpeih thu Thawhlehni khan a sawi.
CM Ibobi Singh chuan, UNC-te nena remna zawnga inbiakna nei turin sorkar chuan hma a la reng tih sawiin, tunah chuan inbiakna nei turin sorkar chu kawng engkimah a inpeih tawh a ni, a ti. District thar pasarih din a nih chhan chu inrelbawlna felfai zawk a awm theih nana tih a nih thu a sawi. Hetih lai hian UNC-te chuan sorkarin district a pek hi nasa takin an dodal a, nikum November 1 aṭang khan tiam chin awm loin National Highway an dangchat a ni. Manipur chakkhai lamna kawngpui pawimawh danchah a nih vang hian mipuite chuan harsatna an tawk mek a, hemi chingfel tur leh, NH danchah tihtawp a nih theih nan state sorkar chuan hma a la mek a ni.
Ibobi Singh chuan inbiakna chu sorkar laipui kaihhruaina hnuaiah neih leh an remtih thu sawiin, UNC-te chu an sawmna ngai pawimawh turin a ngen. February thla tir lam khan sorkar laipui hmalaknain inbiakna hi neih a lo ni tawh a, inremna tluantling siam a la nih loh avang leh, UNC-te'n NH dan an la kalpui reng avangin kawng hrang hrangin hma lak leh mek a ni.
Home Minister Rajnath Singh-a'n NH dan chungchangah, Congress chu politics-a hamṭhatna zawngah a puh a, hei hi Ibobi Singh chuan an pawm ve loh thu a sawi. Rajnath Singh hian Manipur sorkar chuan Central force-te chu engmah lo maiah an chantir niin a sawi a, NH dang chattute chu thlamuang takin an awm a ni, ti. Naga he, National Socialist Council of Nagaland - Isak-Muivah (NSCN-IM)-te pawh tlangnel takin an khawsa niin a sawi a, sorkar laipui chuan UNC-te'n lungawi lohna an lantir mek titawp turin tih theih a nei tlem hle a ni tiin, state sorkar chu a taka dan leh thupek kengkawhtu a nih thu a sawi. Hetih lai hian Ibobi Singh-a kaihhruai Congress sorkar chuan sorkar laipui chu Naga-te thlavang hauh leh, BJP hamṭhatna tur chauh ngaihtuahah an puh mek bawk.
Manipur chakkhai lamna kawngpui pawimawh NH-37 hi ni 100 chuang dan a ni tawh a, hei hian nasa takin thil man a tisang a ni. Oil leh nitin mamawh a harsatna avang hian ṭhenawm state aṭang tein chakkhai lakluh a nih bakah, sorkar laipui ruahmannain bungrua chawk luh a ni. Oil tanker leh bungraw phur truck-te chuan venhimna hnuaiah Manipur khawpui Imphal an pan a, kawng lakah lambun an tawk fo bawk a ni.