NH dan chah a pawi takzet : Manipur Governor
Manipur Governor Najma Heptulla chuan, United Naga Council (UNC)-te'n tiamchin awm loa National Highway (NH) an dang chat chu thil pawi tak a nih thu Nilaini khan a sawi.
Governor Najma Heptulla chuan, NH danchah a nih avanga Manipur mipuite chunga tawrhna thleng chu thil pawi tak a ni a, a demawm tak zet a ni, a ti. Sorkar hmalakna dodal nana mipuite chunga tawrhna thlen tir chu thil pawi tak a ni a, tun hnuah chuan thleng tawh lo tura a duh thu a sawi. A chinfel dan ngaihtuah kawnga ṭanrual a pawimawh thu sawiin, sorkar laipui leh state sorkar hmalakna turah dah mai lo a, state chhunga hnam hrang hrangte chu ṭanrual a ngaih thu a sawi bawk.
Tiamchin awm loa NH dan chah chu Manipur-in harsatna a tawh zinga pawi leh harsatna thlen nasa ber zinga mi a nih thu Governor chuan sawiin, thleng nawn tawh lo se a duh tih a sawi. Chakkhai lamna kawngpui pawimawh ni 100 chuang dan a nih avanga thil man sang chuan mipui nawlpui a nghawng tih sawiin, a chinfel dan kawng ngaihtuah reng a ni, a ti. Oil harsatna avanga zirlaiten harasatna an tawk chu hriatthiam har tak a ni, an hma lam hun zel atan harsatna naasa zawk an tawh loh nan theihtawp chhuaha hma lak a ngai a ni, a ti bawk. Manipur-ah hian petrol leh diesel duh anga lei tura awm loh bakah, a man a san em avangin lirthei neituten harsatna an tawk a, hei hian zirlaiteah pawh nghawng neiin, school ṭhenkhat chu khar lailawk a lo ni tawh a ni.
Hetiang boruak a awm mek lai hian, Assam Chief Minister Sarbananda Sonowal chuan Manipur buaina chingfel theitu chu Bharatiya Janata Party (BJP) chauh an nih thu Nilaini khan a sawi. Sonowal chuan Assam-ah Congress-in kum 50 chhung vel thuneihna an chan chhungin harsatna hrang hrang an tawk tih sawiin, chutiang chu Manipur-a Congress kaihhruai sorkar hnuaiah pawh mipuiten an tawk ve mek niin a sawi. Manipur assembly election neih tur chu mipuiten rilru fim tak hmanga an hmachhawn a ṭul thu sawiin, sorkar thlak thlengna hun ṭha a ni, a ti.
Sonowal chuan Assam-a BJP sorkar a din hnuah hmasawnna ataka hmuh theiha a awm thu sawiin, Manipur mipuite duhthlannain chutiang thil chu a thleng Manipur-ah pawh a thleng ve thei tih a sawi. Prime Minister Modi chuan hmarchhak hmasawnna a ngaihpawimawh thu sawiin, BJP kaihhruai sorkar chu hmarchak tana inghahna tham a ni, a ti. UNC-te'n Congress sorkar hmalakna duh lohna lantir nana nikum November 1 aṭanga NH an danchah avanga mipuite chunga tawrhna thleng mek chu pawi a tih thu a sawi bawk.