AP CM hlui thih dan SC-in ngaihtuah dawn
Aruanchal Pardesh chief minister hlui, Kalikho Pul-a thih dan chu nimin khan Supreme Court (SC)-ah ngaihtuah a ni.
Kalikho Pul hi nikum August khan a office-ah thia chhar a ni a, mahni inawkhluma ngaih a ni. Hetih lai hian Pul-a nupui Dangwimsai Pul chuan a pasal thihdan chhui chian a nih theih nan Chief Justice of India, Jagdish Singh Khehar hnenah ngenna lo thlen tawh a, nimin khan SC chuan a chungchang hi a ngaihtuah ta a ni. Pul-a chungchang hi Justice Adarsh Kumar Goel leh Justice Uday Umesh Lalit-te chuan an ngaihtuah a ni.
Arunachal Police-te chuan Pul-a thih hnu hian, a lehkha hnutchhiah phek 60 zet chu an hmuchhuak a, a kawmah hian ‘Mere Vichar’ (my views) tih a inziak a, a thu inziakte hi mipui hriatah tlangzarh a ni lo thung.
Pul hi February 19, 2016 khan Chief Minister atan lakluh a ni a, Nabam Tuki-a kaihhruai Congress sorkar-ah helin, MLA eng emaw zatte nen party an chhuahsan hnuah a ni. Mahse Supreme Court July 13, 2016-a Congress sorkar din leh tura thupek a tih chhuah hnuah, chief minister a nihna aṭanga paihthlak a ni a, a hnu rei loteah a office-ah thia hmuh a ni zui ta a ni.