Zeliang-a'n a ban chhan sawifiah

Nagaland Chief minister bang ta TR Zeliang chuan boruak muanawm a awm leh theih nana bang a nih thu a sawi.

Zeliang chauan, politics avanga state mipuiten harsatna an tawk chu pawi a tih thu sawiin, boruak muanawm a awm leh theih nan leh, mipuite chunga harsatna nasa zawk a thlen loh nana banna thehlut a nih thu a sawi. Hetih rual hian sorkar laka lungawilo ten sorkar building leh lirthei eng emaw zat an hal chu pawi a tih thu leh, buaina chhuak vanga nunna chan ta chhungte a tawrhpui thu a sawi bawk.

TR Zeliang chuan Naga­land chief minister thar atan lakluh, Naga People’s Front (NPF) president Dr. Shurhozelie Liezeitsu leh a cabinet minister-te chu duhsakna a hlan thu sawiin, mipui tana theihtawp chhuaha hna thawk zel turin a chah. Dr. Shurhozelie Liezeitsu hi Nilaini khan Nagland Chief Minister 17-na atan lakluh a ni a, a rual hian cabinet minister 11 lakluh an ni bawk.

Zelianga kaihhruai sorkar chuan kum 2016 khan Urban Local Body (ULB) election-a hmeichhe tana seat 33% hauhsak turin thutlukna a siam a, tribal-te'n nasa takin an dodal zui a ni. Nagaland Tribes Action Committee (NTAC) leh Joint Action Committee (JJC)-te chuan thutlukna siam chungchangah hian Zeliang-a chu mawhphurtu berah puhin, nasa takin bang turin an nawr a, kar kalta Pathianni khan chief minister a nihna aṭanga a ban thu a puang ta a ni.