Tripura CM hlui hnena venhimna pek tihtlem sak

Tripura-a pawl hrang hrang, leh eptu party Congress-in chief minister Biplab Kumar Deb hnena venhimna pek a nih dan chungchang an sawisel hnuah, state sorkar chuan Deb security cover hi a tihtlem sak.

Senior police officer chuan Deb venhimna pek zingah hian car pali ( security mi leh sa 20 huam telin) paihsak an ni tih a sawi.

Kum 2018, March 9 -a Tripura-a a ṭum khatna atana BJP kaihhruai sorkar a din khan Deb hi chief minister atan lakluh a ni. Mahse kumin May 14 khan central lama party hotute thurawn angin CM a nihna aṭang hian a bang a, a ban chhan tak hi an sawichiang lo.

Mahse Chief Minister a nihna aṭang a ban hnuah pawh, Z category security chu pek chhunzawm zel a ni a, hei hian sawizui leh sawisel a hlawh ta hle a ni. CM a nih lai ang chiaha security cover pek a ni chu mipui sum dik lo taka hmanna niin Congress chuan an sawi a, Tripura Congress hruaitu Sudip Roy Barma chuan Tripura High Court-a public interest litigation (PIL) thehluh a tum thu pawh a lo sawi tawh a ni.