Nagaland-in hnam thuam chungchangah document siam dawn

Nagaland sorkar chuan an hnam thuam, design leh tlereuhte dik lo taka hman a ni tur venna atan document siam a tum.

Chief minister Neihphiu Rio chuan Thawhṭanni khan Hobo hnam hrang hrang, Naga hnam pawl lian ber chu hemi chungchangah hian meeting a neihpui.

CM Rio chuan Naga hnam thuam leh tlereuhte chu fashion show-ah design dik lo tak taka pholan a ni ṭhin tih sawiin, a neitu hnamte tana a pawimawh leh an ngaihhlut dante ngaihtuah sak loin e-commerce platform lamahte an hnam thuam hi zawrh a ni ṭhin a ni, a ti. "Hnam thuam leh a nih dante dik lo taka hman a ni ṭhin hi ven a ngai a ni," tiin a sawi.

Hnam dangte chuan Naga hnam thuamte chu an inbel ve tur tihna a nih loh thu leh, zawrchhuah theih a ni lo tihna a ni lo tih Rio chuan a sawi a, mahse an inbel a nih pawhin a nihna ang takin an hmang tur a ni, a ti. Hnam thilte chu dan hnuaia humhalh a nih theihna tura hmalak a ṭul thu a sawi a ni.

Nagaland-ah hian tribal hnam hrang 16 an awm a, heng hnam hi Naga mipuite maktaduai hnih chuang zinga 86% an tling pha a ni.