Manipur Election: Vawiinah Modi-a'n Manipur tlawh dawn

Prime Minister Narendra Modi chuan vawiin hian Manipur a tlawh dawn a, hetih lai hian hel pawl ṭhenkhat chuan Modi-a'n Manipur a tlawh tur hi an boycott an tum.

PM Modi hi Manipur Assem­bly election neih turah an party, BJP tan a campaign dawn a, vantlang inkhawmah thu a sawi ang. Hetih lai hian Manipur-a helpawl paruk inzawmkhawm Coordinating Committee (Corcom) chuan tukin zing dar 6 aṭang khan curfew an puang a, Modi-a'n state khawpui Imphal a chhuahsan hma loh chuan curfew hi kenkawh a nih tur thu an sawi. Police-te chuan Modi-a'n Imphal a tlawh turah dan leh thupek khauh zawka kenkawh a nih thu an sawi a, venhimna pawh ṭha zawka kalpui a nih thu an sawi.

Police-te chuan curfew puan a nih chhungin mipuite chu fimkhur turin an chah a, mahni in chhuahsan lo turin an ngen. Curfew puan hian media-te a huam dawn lo a, emergency thil a huam lo bawk ang. Hetih lai hian rorel lai Congress party chuan Modi-a'n Manipur a cham chhungin sorkar laipui leh National Socialist Council of Nagaland - Isak-Muivah (NSCN-IM)-te'n inremna an ziah chungchang chu mipui hriata puan zar an phut thu an sawi. Zirlai pawl leh women activist-te chuan sorkar laipuiin Naga hel NSCN-IM-te inremna a ziahpui chungchang chinfel a, puanzar an phut thu an sawi ve bawk.

Police-te'n bomb hmuchhuak
PM Modi-a'n Manipur a tlawh dawn avang hian venhimna khauh taka kenkawh a ni a, nimin khan police-te chuan hmun hrang hrangah bomb an hmuchhuak. Bomb-te hi vantlang inkhawm buatsaihna tur bul hnai leh, Modi-a'n thu a sawina tur Imphal West district-a Langjing Achouba ground bul hnaiah te pawh hmuh a ni. Heng bomb-te hi China siam hand grenade a ni a, Ningombam Leikai khuaa BJP candidate Soibam Subhachandra-a chenna in kawtah pawh hmuh a nih thu tarlan a ni. Thoubal district-a BJP mi leh sa O Sunil-a chenna kiangah pawh bomb hi hmuh a ni bawk.

State police commando-te chuan chhun zan zawmin venhimna an kalpui a, hmun hrang hrangah duty dah an ni a, additional SP S Ibomcha leh DSP Thankhochon-te chuan an vil a ni. Taobungkhok Awang Leikai khuaah chuan in tinah lutin hel dap chhuah hna thawh a ni a, hmun hrang hrangah venhimna khauh taka lekkawh a ni.