Nagaland CM tharin boruak ralmuang awm a duh

Nagaland Chief Minis­ter thar atana lakluh Dr Shurhozelie Liezietsu chuan state chhunga buina thleng mek chu chingfel tura hma a lak nghal thu leh, boruak ralmuang a awm leh thuai a beisei thu a sawi.

Dr. Liezietsu hian Ningani khan Kohima-ah thuthar thehdarhtute a kawmnaah he thu hi a sawi a ni. Nagaland CM thar chuan a office a luah ṭanniah ṭawngtaina hun an hman thu sawiin, boruak ralmuang tak hnuaiah mipuite an awm leh theih chu a kaihhruai sorkarin a duh ber niin a sawi. State sorkar chuan mipuite tan rawng a bawl dawn tih sawiin, mipuite thlawpna an mamawh thu a sawi. Tun hnaia tribal pawl hrang hrangte nawrhna huaihawt avanga buaina chhuak chu pawi a tih thu sawiin, nunna chan mi pathum chhungte chu a tawrhpui takzet tih a sawi. Tribal-te chu inbeng dai tura ngenin, inbiakna neihpui a duh thu a sawi bawk.

Liezietsuhi tunkar Nilaini khan Nagland chief minister 17-na atan Nagaland Civil Secre­tariat-ah Governor chuan a la lut a, Nagaland Tribes Action Committee (NTAC) leh Joint Action Committee (JJC)-te'n nasa taka an nawr hnua banna thehlut ta TR Zeliang-a a thlak a ni. CM thar lakluh rual hian cabinet minister 11 lakluh nghal an ni a, an hna chanpual tur tarlan a la ni lo. Chief minister chuan minister-te hna chanpual tur chu ni rei lote hnuah chinfel a nih tur thu sawiin, Assembly Speaker tur pawh ruat thar a ni dawn niin a sawi.