Manipur Governor-i'n NH dan titawp turin UNC-te a ngen

Manipur Governor Najma Heptulla chuan United Naga Council (UNC)-te'n state sorkarin district thar a din duh lohna lantir nana tiam chin awm loa National Highway (NH) an dan chah mek chu tawpsan tawh turin a ngen.

Heptulla chuan NH dan chah a nih chu pawi a tih thu sawiin, UNC-te chu mipuite tawrhna thlen chhunzawm tawh lo tur leh, an kawngpui dan titawp tura a phut thu a sawi. Thuthar thehdarh tuten an kawmnaah he thu hi sawi chhuakin, UNC-te sorkar laka an lungawi loh avanga mipuite chunga tawrhna thleng chu a dem thu leh, NH dan chah mek chu tawpsan tawh tura a duh thu a sawi. Manipur chakkhai lamna kawngpui pawimawh dan chah chuan mi nawlpui a ngawng thu sawiin, Naga-te ngei pawhin an tawrh nasat thu a sawi bawk.

Manipur governor chuan buaina chu inbiakna hmanga chinfel theih a ni a ti a, UNC hruaitute chu sorkar nena inbiakna nei tura kawng hawn sak turin a ngen. State sorkar chu remna zawnga inbiakna nei turin a inhawng reng tih sawiin, UNC-te chu an lungawi lohna a hriathiampui thu leh, an harsatnate chinfel a duh thu a sawi. A bikin Valley district-a chengte chuan UNC-te nawrh huaihawt chu an tawrh thu leh, Hill District-a mite pawhin kawng hrang hranga harsatna an tawh thu sawiin, assembly election thlenga nghawng buai thei thil a nih avangin NH danchah chu tawpsan a hun tawh takzet a ni, a ti.

Governor chuan UNC-te'n tiam­chin awm loa NH an dang chat a dem thu hi a lo sawi tawh a, mipuite chunga tawrhna thleng hi thil pawi tak a ni a, a demawm takzet a ni, a ti. Sorkar hmalakna dodal nana mipuite chunga tawrhna thlen tir chu thil pawi tak a nih thu sawiin, tun hnuah chuan thleng tawh lo tura a duh thu leh, hmasawnna dal thei zawnga chetna thleng tawh lo se a duh thu a sawi. Buaina chinfel dan ngaihtuah kawngah ṭanrual a pawimawh thu sawiin, sorkar laipui leh state sorkar hmalakna turah dah mai lo a, state chhunga hnam hrang hrangte chu thawh ho puiah a lo sawm tawh bawk. Assam Chief Minister Sarbananda Sonowal pawhin, NC-te'n NH an danchah avanga Manipur mipuiten harsana an tawk chu pawi a tih thu sawiin, an buaina chingfel theitu chu Bharatiya Janata Party (BJP) chauh an nih thu a lo sawi tawh bawk.

UNC-te hian kum 2016-a state sorkarin Jiribam leh Sadar Hills-te, district-a hlangkai tura thutlukna a siam hnuah lungawi lohna an lantir ṭan a, hemi hnu hian sorkar chuan district thar pasarih a din zui bawk avangin sorkar laka lungawi lohna lantirin nikum November 1 aṭang khan tiam chin awm loin NH an dangchat a ni. District thar puan a nih dawn hian chief minister Ibobi Singh pawhin beih a tawk a, a nunna atan a derthawn theih vangin State khawpui Imphal-ah hruaikir leh a ngai hial a ni.