Naga Accord chinfel hmain mipui ngaihdan lak a ni ang : Kiren Rijiju

Union Minister of State for Home Kiren Rijiju chuan sorkar laipui leh Naga hel, National Socialist Council of Nagaland - Isak-Muivah (NSCN-IM)-te'n inremna zawnga inbiakna an neih 'Naga Accord' chu ziahfel a nih hmain Manipur mipui ngaihdan lak a nih tur thu a sawi.

Sorkar laipui chuan kum 2015 khan NSCN-IM-te hi inremna lailawk a lo siampui tawh a, inremna tluantling erawh ziah a la ni lo. Hemi chungchangah hian mipui ngaihdan lak a nih tur thu hi Rijiju chuan a sawi a ni. NSCN-IM-te chungchang chu ngun taka ngaihtuah a ṭul thu sawiin, mipui ngaihdan pawh lak a ni ang, a ti. Sorkar laipui aiawha NSCN-IM-te nen inbiakna neiha palai hna thawktu, R N Ravi pawhin Manipur mipuite ngaihdan lak a nih tur thu hi a lo sawi tawh bawk.

August 3, 2015 khan sorkar laipui chuan NSCN-IM-te hi 'Framework Agreement' a lo ziahpui tawh a, hemi ṭum hian sorkar laipui palai Ravi chuan Prime Minister Narendra Modi leh Union Home Minister Rajnath Singh-te aiawhin hming a ziak a, NSCN-IM General secretary T Muivah chuan hming a ziah hnan ve bawk.