AP sorkarin rualban lote pension tipung dawn

Arunachal Pradesh Chief Minister Pema Khandu chuan, state chhunga pianphunga rualban lote pension hlawh chu tihpun sak an nih tur thu a sawi.

Arunachal CM Khandu hian tun hnai khan Composite Regional Centre for Persons with Disabilities (CRCPD) a hawng a, Chief Minister Disability Pension Scheme hnuaiah pianphunga rualbanlote pension hlawh tihpun a nih tur thu hi a sawi a ni. Tun dinhmunah state sorkar chuan heng mite hi tha tin Rs. 1,000 a pe ṭhin a, hei hi tihpun thuai tum a ni, a ti. Sorkar chuan rualbanlote tan centre hawn belh zel a tum thu sawiin, kawng hrang hrangin an hamṭhatna tur ngaihtuah a ni ang, a ti bawk.

Pema Khandu chuan sorkar laipuiin Arunacha-a centre dinna tur hian cheng vaibelchhe 20 a ruahman thu sawiin, centre-a thawktu tur pawh lakbelh zel tum a ni, a ti. Centre hi National Institute for Locomotor Disabilities (NILD), Kolkata of Department of Empower­ment of Persons with Disabilities leh Ministry of Social Justice & Empower­ment, Government of India hnuaiah din a ni. A hawnna inkhawmah hian Union Minister of Social Justice & Empower­ment Thaawarchand Gehlot, Union Minister for Home Affairs Kiren Rijiju leh Union Minister of State for Social Justice & Empowerment Krishan Pal Gurjar-te chuan an telpui a ni.