Manipur-ah BJP a sorkar dawn : Modi

Prime Minister Narendra Modi-a chuan Inrinni khan Manipur a thleng a, Imphal-a vantlang inkhawmah thu sawiin, Bharatiya Janata Party (BJP) chuan Manipur-ah sorkarna an siam dawn niin a sawi.

PM Modi-a chuan, Congress sorkarah Manipur mipuiin rinna an nghat ngam tawh lo a, kum 15 chhung zet ro an rel hnuah paihthlakin an awm dawn a ni, a ti. Naga accord chungchang sawiin, August 3, 2015-a Naga hel National Socialist Council of Nagaland - Isak-Muivah (NSCN-IM)-te sorkar laipuiin 'framework agreement' a ziahpui hnuah Manipur sorkar chuan hmalakna engmah a nei zui lo niin a sawi. Congress kaihhruai sorkar chu a muthlu nia sawiin, Chief Minister Okram Ibobi Singh chuan mipuite a bumkual a ni, a ti.

CM Ibobi Singh-a kaihhruai sorkar chuan Manipur ṭhalaite tan hna a tawk ṭha tawk lo tih Modi-a chuan sawiin, sorkar chu mipuite tan hna thawk ṭha tawk loah a puh. United Naga Council (UNC)-te'n tiamchin awm loa National Higway an dangchat chu pawi a tih thu sawiin, Congress sorkar chak tawk loh vang a ni a ti a, BJP-in sorkarna a chang a nih chuan hetiang thil hi a thleng lo ang, a ti. State sorkar chuan NH danchah mek titawp turin hma a la chak tawk lo tih sawiin, PM chuan sorkar laipui chu Manipur buaina chingfel turin a inpeih thu a sawi. Hetihlai hian state sorkar chu hmalatu tak tak tur a nih thu sawiin, sorkar laipui chu anni pui tur hian a inpeih tih a sawi.

Modi-a chuan Manipur mi­puite inpumkhatna te, hmasawn­na leh mipui mimir te ham-ṭhatna chu BJP kaihhruai NDA sorkar ngaih pawimawh leh tum ber a ni, a ti. Congress-in kum 15 ro an rel chhungin hmasawnna liam tham hmuh tur a awm lo nia sawiin, BJP-in sorkarna an siam a nih chuan thla 15 chhunga hmasawnna hna tihkhawtlai te thawh zawh vek a tiam. Congress party kaihhruaina hnuaiah Manipur chuan tlakchhiat lam a pan zel a, a mawhphurtu chu sorkarna fawng vuan mektute an ni tiin, Congress sorkar chu Manipur hmasawnna daltu a nih thu a sawi. Eirukna a hluar hle tih sawiin, hei hi BJP-in sorkarna an siam a nih chuan a bo ang, a ti bawk.

PM hian Imphal West district-a Lanjing Achiuba-ah thu a sawi bawk a, Manipur ṭhalai infiamna lama talent nei ṭha tak tak tak te chu hma lak pui zel an nih tur thu a sawi. Sports University din thuai a nih theih nan hma lak zel a nih tur thu a sawi.

Hmarchhak tel loin India hmasawnna a tluantling lo
Prime Minister chuan India ramin nasa taka hma a sawn thu sawiin, hetih lai hian hmarchhak tel lo chuan hmasawnna chu a tluantling lo a ni tiin, hmarchhak hmasawnna a ngaihpawimawh thu a sawi. Hmarchhakin hma a sawn loh chuan India ram hmasawnna chu a tluantling lo a ni, a ti. Atal Bihari Vajpayee-a khan India rama hmun kilkhawr ber thlengin hmasawnna tur ruangam a din a, mahse Congress chuan a ngaihthah a, a nih tur angin a kalpui lo a ni, a ti. BJP kaihhruai sorkar chuan Vajpayee-a ruahmanna lo siam tawh angte chu a takin an kalpui mek thu leh, hei hian hmarchhak pawh a hrut mek thu a sawi

Modi-a chuan BJP chu hmarchhakte hmasawnna ngaihtuahtu leh an ṭhian ṭha an nih thu a sawi a, hmarchhak chu 'organic region'-ah siam tuma hmalak mek a ni, a ti.

Manipur-ah hian March 4 leh 8-ahte assembly election neih a ni dawn a, party hrang hrangten campaign an nei ngawrh tawh hle. Campaign kalpui mek a nih lai hian Model Code of Conduct bawhchhe zawnga che te dapchhuah hna thawh mek reng a ni a, sum thianghlim lo leh ruihtheih thil ṭhahnem tak an man tawh a ni. State chhunga hmun hrang hrangah cheng nuai 57 vel man a ni tawh. Assembly election neih chhung hian zu leh ruihlo dangte khap a nih tur thu, state excise department chuan a tarlang. Manipur-ah hian dan khauh tak siam a nih hnuah kum 1991 aṭang khan 'dry state'-ah puan a ni. Chief Election Commissioner Nasim Zaidi pawhin Manipur a tlawh ṭumin, election kaihhnawihah ruihlo khuahkhirh a nih tur thu a lo sawi tawh bawk.

Hetih lai hian Manipur-a hel pawl paruk inzawmkhawm, Coor­dinating Committee (Corcom) chuan Prime Minister Naren­dra Modi-a'n Manipur a tlawh denchhenin Inrinni zing dar ruk aṭang khan curfew an puang.

Corcom-te chuan PM Modi-a'n Manipur assembly election neih tura BJP tana a campaign zawh hnu, an state a chhuahsan hnuah curfew hi an hlih tur thu an lo sawi tawh a ni. Curfew puan a nih vang hian buaina thleng lian tham hriat tur a awm lo a, police-te chuan venhimna khauh takin an kalpui a, mipui nawlpuiin an zawm ṭha hle tih tarlan a ni. Curfew puan a nih vang hian vantlang inkhawm buatsaihah mipui an tel ṭha lo a, mahse ruahman anga kalpui tho a ni. Manipur-a helte hian central-a sorkar mi pawimawhin an state an tlawhin ṭum eng emaw zat an lo boycott tawh a ni.