Manipur CM-in PM a chhang let

Prime Minister Narendra Modi-a'n Mani­pur tualchhung buaina thleng mekah Congress kaihhruai sorkar chu mawhphurtu a ni a ti a, hei hi Manipur Chief Minister Okram Ibobi Singh chuan na takin a chhang let.

CM Ibobi Singh chuan Congress Bha­van-ah thuthar thehdarhtute kawmin, Congress kaihhruai sorkar chuan mipuite tan hmasawnna hna nasa taka a thawh thu leh, mipuiten harsatna an tawh mek sukiang tura nasa theihtawpa hma a lak thu a sawi. Manipur chuan power supply an nei ṭha hle tih sawiin, ṭhenawm state dangte ai pawhin an nei ṭha tih a sawi. Delhi-a power reformation summit neih a nih ṭum pawhin a kaihhruai sorkarin power lama hma an lak ṭhat avanga an fak thu sawiin, mipuiten power hnianghnar an neih theih nan theihtawp an chhuah thu a sawi. Modi-a'n United Naga Council (UNC)-te'n tiam chinawm loa National Highway (NH) an dan chah chhan leh, tun thlenga hlih a la nih loh chungchanga Congress kaihhruai sorkar mawhphurtua a puh chu a hriatthiam loh thu a sawi.

Manipur CM chuan, "Modi-a'n mipuite hmaah BJP-in sorkarna kan siam a nih chuan NH dan chah kan titawp ang tiin a sawi a, hei hi mipuite bum tumna leh vote zawnna a ni", a ti. BJP chu a ruka UNC-te leh National Socialist Council of Nagaland - Isak-Muivah (NSCN-IM)-te inzawmna neihpuiah a puh a, Congress sorkar lakah hel turin a fuihpawrh bawk a ni, a ti. Modi-a'n BJP-in sorkarna an siam a nih chuan ni 150 chhunga hmasawnna hna tangkhang mekte chinfel a tiam pawh chu thil atthlak tak niin a sawi bawk.

Ibobi Singh chuan central-a BJP hruaitu leh minister ṭhenkhatin an state an tlawh fo chu thil ṭul lo leh, awmze nei lo niin an sawi a, a thu maiin mipuite tan hmasawnna hna thawh an tiam a ti, a ti. Sports University siam chungchang chu sorkar laipui kuta awm a nih thu sawiin, state sorkar chuan thuneihna a nei lo tih a sawi a, hei pawh hi BJP chuan vote zawnna remchangah an hmang a ni, a ti. Sports leh culture-te chu politics-a hamṭhatna zawn nan hman chi a nih loh thu sawiin, BJP chetdan chu a dem takzet thu a sawi.

Prime Minister Narendra Modi-a chuan kar kalta Inrinni khan Manipur a tlawh a, hmun hrang hranga vantlang inkhawmah thu a sawi a ni. Modi-a chuan vantlang inkhawmah, Congress sorkarah Manipur mipuiin rinna an nghah ngam tawh lo thu te, kum 15 chhung zet ro an rel hnua paihthlaka an awm tur thu te a sawi. Manipur sorkar chu August 3, 2015-a Naga hel National Socialist Council of Nagaland - Isak-Muivah (NSCN-IM)-te sorkar laipuiin 'framework agreement' a ziahpui hnuah pawh hmalakna engmah nei zui loah a puh a, CM Okram Ibobi Singh chuan mipuite a bumkual niin a sawi. United Naga Council (UNC)-te'n tiamchin awm loa National Highway an dan chah chungchang Congress sorkar chu mawhphurtuah puhin, mipuite harsatna chinfel a nih thei nan hma la tawk loah a puh bawk a ni.