JCC leh NTAC-te'n an thil phut tawpsan mai tum lo

Nagaland-a Joint Coordination Committee (JCC) leh Nagaland Tribes Action Committee (NTAC)-te chuan, Nagaland sorkar laka an thil phutte chu a hlawhtlin hma loh chuan tawpsan mai an tum loh thu an sawi.

JCC leh NTAC-te hian Pathianni khan Diphupar-ah 'candle light service' an nei a, January 31-a police-te silai hmehpuaha thi ta mi pahnihte hriatrengna hun an hmang a ni. Nagaland-ah hian tribal-te chuan state sorkarin Urbal Local Body (ULB) election-a hmeichhe tana seat 33% hauhsak tura thutlukna a siam duh lohna nasa taka lantir a ni a, January 31 khan Dimapur-ah nawrh huaihawtte leh police-te chu innawr buaiin, silai hmehpuahah Khriesavizo Metha leh Bendangnungsang Lkr-te chuan nunna an chan a ni. Anmahni hriatrengna inkhawm­ah hian JCC leh NTAC-te chuan sorkar laka an thil phutte chu tihhlawh­tlin a nih hma loh chuan hma an lak chhunzawm zel tur thu an sawi a ni.

JCC hruaitu Vekhosayi Nyekha chuan ULB election-a hmeichhe tana seat 33% hauhsak chu an remti ngai dawn lo tih sawiin, sorkar chu thutlukna a lo siam tawh sut leh tura an ngen thu a sawi. Nyekha chuan an phut anga TR Zeliang-a'n Chief Minister a nihna aṭanga banna a thehlut chu lawmawm an tih thu sawiin, hetih rual hian Dimapur Commissioner of Police hlui Liremo Lotha leh mi pahnih thahnaa mawhphurtu IRB mi leh sa pakhat chu an phu ang tawk hremna pek an phut tih a sawi a, Nagaland Municipal Act chu a rang thei ang bera siamṭhat an phut tih a sawi bawk.

JCC leh NTAC-te hmalakna hi Diphupar Village Council, Diphupar Naga Youth Organization (DNYO), Diphupar Naga Students’ Union (DNSU) leh Diphupar Naga Women Organization (DNWO)-te chuan an thlawp thu an sawi tawh a, kawng hrang hranga an hmalakna te thlawp zel an tum thu an sawi. JCC leh NTAC-te hian ULB elecltion-a hmeichhe tana seat 33% hauhsak chu sut an phut a, hemi duh lohna lantir a nih ṭuma thihna thlenga mawhphurtute dan anga hrem an phut bawk. Hetih lai hian chief minister a nihna aṭnga bang tura an phut TR Zeliang chuan banna a thehlut a, pawmsak a ni tawh bawk.

Kum 2015 khan Nagaland cabinet chuan ULB election-a hmeichhe tana seat 33% hauhsak tur hian thutlukna a siam a, hei hi a tir aṭangin tribal pawl hrang hrangte chuan an dodal a ni. ULB election hi February 1-a neih tura tih kha a ni a, mahse dodalna nasa tak avangin a hun sawn a ni. JCC leh NTAC-te chuan January thla tawp lam aṭang khan state chhung hmun eng emaw zatah bandh an huaihawt a, elelction neih hun tura tih ni pawh hian bandh hi kalpui a ni a, mipuiten an thlawp ṭhat avangin election hi kaltlangpui theih a ni lo. State cabinet chuan elelction hi kaltlangpui turin thutlukna siam mah se dan leh thupek mumal taka kenkawh theih a nih loh bakah, tribal-te bandh huaihawt avang hian ṭhulh a ni ta a ni.

JCC leh NTAC-te chuan chief minister hlui TR Zeliang chu nasa takin bang turin an nawr zui a, a cabinet minister ṭhenkhatte pawh bang tura an duh thu an sawi. Eptu party ṭhenkhat chuan dan leh thupek kenkawh mumal theih a nih loh avangin 'President's Rule' puan mai an phut bawk. TR Zeliang chuan New Delhi panin, President, Prime Minister leh Union Home Minister-te meeting a neihpui hnuah, banna thehlut ta a ni. Zeliang-a thlak turin, Dr. Shurhozeilie Leizietsu chu February 22 khan Governor P.B. Acharya chuan a la lut. Kum 81 mi Dr. Shurhozeilie hi Naga People’s Front (NPF) president ni lai a ni a, Nagaland chief minister 17-na atan lakluh a ni.