Meghalaya-ah Hel pawl hruaitu kaphlum

Meghalaya Special Force-10 (SF-10) commando-te chuan Meghalaya jail official pahnih leh, Assam khua leh tui mi pasarih zet thattua puh Singbirth N. Marak alias Norrok X. Momin chu kar kalta Inrinni khan an kaphlum niin police official chuan a tarlang.

Norrok X. Momin hi United A’chik Liberation Army (UALA) hruaitu hlun a ni a, Meghalaya-a pawikhawihna leh inthahna thlengah vawi tam tak a inhnamhnawih tih hriat a ni a, man tuma an zawm lai mek a ni. Police official chuan Inrinni-a inkahna thlengah hian, Meghalaya Special Force-te chuan Norrok X. Momin bakah, amah zuitu hel mi leh sa panga vel an kaphlum tel tih an sawi a, an kut aṭang hian AK-rifle, pistol leh grenade eng emaw zat an man tel tih an sawi. Meghalaya Special Force-te hian hel dap chhuah hna hi Matronggre forested area-ah an kalpui a, hei hi state khawpui Shillong aṭanga km 315 vela hla a ni. Helte hian lo kap hmasain, hun eng eng emaw chen an inkah hnuah helte hi kahhlum an ni ta tih, district police officer Dalton P. Marak chuan a sawi.

Norrok hi kum 2010-a East Garo Hills-a Williamnagar jail official pahnih thahnaah khan mawhphurtu berah ngaih a ni. Hei bakah hian kum 2013-a Assam, Goalapara district-a mi pasarih thahnaah khan mawhphurtu berah puh a ni bawk. UALA hruaitu lawk Norrok, chairman Novembirth Marak leh an pawl mi leh sa 68 zet te chu kum 2016 June 10 khan Meghalaya sorkar kutah an ralthuam nen an inpe a ni. Hemi hnu hian Norrok hian United A’chik National Front (UANF) din lehin, Meghalaya leh Assam border area velah te an che ṭhin tih police-te chuan an sawi.