Assam-a ruahsur nasa vanga tuilian leh leimin tuar nasa ber, Dima Hasao chu naktukah central team-in an tlawh dawn a, chhiatna thlen dan hrang hrangte an enfiah ang. 
Chief minister Himanta Biswa Sarma chuan central aṭanga expert team-in an state an tlawh tur thu hi sawiin, he district-a chhiatna thlen dan chu report siamin sorkar laipuiah an thehlut ang a, hemi hnu hian thil chhiate siamṭhat hna hi thawh a ni ang, a ti. 
CM Sarma hian Thawhlehni zing khan helicopter-in Haflong a kal a, heta ṭang hian leiminin Lower Haflong leh Hokai-Pungchi-a chhiatna a thlenna te chu a enkual a ni. Hemi hnu hian Haflong Circuit House-ah official-te nen meeting an nei zui leh bawk. 
Meeting zawha chanchinthar lakhawmtute a kawmnaah, Chief Minister chuan district chhung a fankualnaah inkalpawhna tam tak chhia chu a nihna pangngai anga siamṭha leh turin a hautak dawn hle tih a sawi. State sorkar chuan kawngpui thenfai hna leh, a theih anga inkalpawhna tur kawng dan siamna atan Dima Haso Autonomous Council chu sum lama puihna a pe dawn tih a sawi. Engineer leh official rualten district hi tlawhin, thil chhia hrang hrangte siamṭhat dan tur ruahmanna an siam ang a, state sorkarah report an thehlut ang, tiin a sawi. Hemi hnu hian state sorkar chuan hill district-ah khawsak phung a pangngai chhoh lehna turin a ṭul dan angin hma a la zui nghal ang, a ti. 
District chhunga nitin mamawh ei leh bar lama harsatna tawkte tan, sorkar chuan thlawhtheihna hmangin ei turte hi a thlaksak dawn tih CM chuan a sawi bawk.